國泰航空大裁員，佢旗下嘅國泰港龍更加要即時停止營運，對於香港企業大裁員嘅「第一滴血」，有唔少人批評國泰、國泰港龍係咎由自取，當日國泰港龍有人要求公司航班停飛內地，今日香港遲遲無法疫情「清零」，主要航線為內地嘅國泰港龍就要停止營運。囍雨睇《生果報》，見到有報道話職工盟主席吳敏兒「一度落淚」，認為國泰當空中服務員、飛機師以至香港人係Condom云云，其實，當初要攬炒嘅係你哋，今日公司裁員、港龍停運，吳敏兒依家嚟喊，似係鱷魚淚多啲喎！

總是公司的錯？

囍雨睇新聞，吳敏兒似乎對國泰相當不滿，佢嚴斥公司燃油對沖蝕錢，就搵員工同放棄港龍「填數」，又話國泰要重返談判桌，與工會展開誠意對話，表示政府作為股東之一，應該監管資方有冇對員工做「最大保障」。吳敏兒講咗咁多嘢，囍雨想問一句，員工、工會代表以至吳敏兒代表嘅職工盟，呢一年內有冇做過乜嘢傷害公司呢？所有嘢都只係公司錯「咁離譜」？

喺呢度，等囍雨提提大家，年初疫情初起時，港龍航空公司空勤人員協會喺東涌搞咗個「不和你飛」集會，時任港龍航空公司空勤人員協會總幹事施安娜、職工盟吳敏兒等人想借工業行動甚至罷工脅逼公司航班「全面停飛往返內地」，想令香港全面封關，其中吳敏兒當時就表明，「不少罷工員工的目標是守護香港，他們或需面對資方的秋後算帳，呼籲港人支持其工業行動」。簡單嚟講，就係公司航班如果唔停飛內地，佢哋就玩攬炒。

攬炒成功 求仁得仁

喺國泰港龍有嘅40幾條航線當中，就係以往返內地為主，依家內地控制好疫情，而香港「無得飛」內地，咁以內地線為主嘅國泰港龍，仲邊有市場？仲點生存落去？當初要同國泰港龍攬炒嘅施安娜、吳敏兒等人，今日俾你哋攬炒成功，呢啲唔係「求仁得仁」？

有唔少評論指出，國泰喺黑暴運動期間，既有黑暴阻撓旅客上機，又有職員洩露警員乘搭嘅航班資料，更有空中服務員涉及氧氣樽放氣事件，連同所謂「職工代表」，咁多人喺度倒公司米，就算疫情受控，各地旅客仲坐唔坐港龍來回內地都係一個疑問。吳敏兒昨日哭於人前，其實要喊嘅，應該係國泰或者國泰港龍嘅管理層先啱！

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk