為咗「守護糧支」，一班不斷批評人大常委會決定嘅攬炒派議員，竟然不理民意，選擇延任；當時就有分析指，由於攬炒派議員要向激進支持者交代，佢哋喺議會嘅行為必定會變得更激烈，而攬炒派議員亦表明，佢哋留任嘅其中一項工作，係要「拯救」俾內地部門拉咗嘅「十二瞞逃」，當囍雨喺度諗佢哋會有咩驚天動地嘅「拯救行動」之際，原來佢哋係圍住保安局局長李家超「舉牌」！囍雨唔係想笑佢哋，但舉下牌就當救人，會唔會有啲兒戲呀？

「十二瞞逃」是逃犯

關於「十二瞞逃」嘅問題，囍雨首先要不煩其煩地講多次，佢哋唔係咩普通人，而係「有案在身」、想潛逃台灣而喺內地水域被截獲嘅逃犯，佢哋當中有人涉違《港區國安法》，有人涉及意圖縱火及藏有槍械等等，條條都係大罪，攬炒派成日話要「救人」，救咩人呢？疑犯？逃犯？罪犯？

老實講，所謂留任議會要「救人」，根本只係攬炒派呃支持者嘅把戲，舉牌、叫口號、包圍等「小動作」，佢哋一直都做開，而且仲要係無乜用果隻，攬炒派議員會唔會公開講解下，點樣可以「舉下牌就救到人」？睇返立法會復會之後，表面上攬炒派議員係「有抗爭」，其實就係「越做越縮」，當中原因，就係《港區國安法》生效，佢哋根本唔敢做咩激烈行為，俾人以《特權法》檢控未必好大罪，但如果係阻礙、嚴重影響政權機關運作而被告「國安法」，罪行都好嚴重，咁錫身嘅攬炒派議員會唔會去搏？梗係唔會啦，佢哋為「份糧」咋！

他們是「打工仔」 不是抗爭者

所以，喺建制派佔議會多數、攬炒派無心無力抗爭嘅情況下，基本上佢哋都無乜實質嘢做到，叫口號、舉牌、拉下布，呢啲只係話俾支持者聽，「我哋喺議會有做嘢」；至於支持者收唔收貨，咁就係另一回事。囍雨睇唔少網上評論，有人講過「唔怪得決定留任時班議員死都唔肯講自己會點抗爭，因為佢哋根本就唔係咩抗爭」，囍雨就認為，支持者對佢哋有寄望係有啲「天真同傻」，因為講到底，佢哋都係「保住份工」。

綜觀依家攬炒派喺議會嘅「表現」，其實就係走緊一條溫和支持者覺得佢哋無聊，激進支持者覺得佢哋「無料到」嘅死路；攬炒派成日有個「票債票償」嘅講法，唔知到咗下次選舉，呢班攬炒派議員，仲可以點「呃」啲支持者呢？

原圖：大公報

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk