攬炒派嘅政治貢獻多唔多？見仁見智；但攬炒派嘅政治口號，就肯定多。多，最大嘅好處，就係遇到唔同嘅問題，可以選擇唔同嘅口號，所以即使完全矛盾嘅嘢，都可以兜到冠冕堂皇。例如有共識嘅，可以話「齊上齊落」；有分歧嘅，可以叫「兄弟爬山、各自努力」…
近日，攬炒派遇到嘅「艱難抉擇」，就係面對人大常委會決定所有立法會議員可以繼續履職唔少於一年呢個「問題」，究竟「總辭」好？定接受好？大家等了又等、佢哋諗了又諗，到依家都未有定論（其實係咪諗住拖下拖下、拖到「唔少於一年」呢？）。兩難之際，囍雨留意到，做過民主黨主席嘅何俊仁，同有得「繼續履職」嘅朱凱廸，呢兩日都有各自表述。
何俊仁呼籲不要被抗爭派「綁架」？
簡單嚟講，何俊仁反對「總辭」，認為咁做「冇好大嘅意義、要有好嘅理由」。佢提出一個問題：如果今次唔留任，咁下屆仲選唔選？何俊仁認為激進抗爭派冇考慮過呢個問題，所以傳統攬炒派（姑且咁區分）「留任其實是對選民負責」，「民主派不會被抗爭派綁架」。而朱凱廸就提出兩個觀點，一係攬炒派應該集體杯葛延任，二係「邊啲人去、邊啲人留」，應該「以公投或民調」嚟決定。表面上睇，兩個人好似講緊兩個完全相反嘅方向，但實質又係唔係呢？
如果問囍雨，何俊仁提出所謂「下屆仲選唔選」，好明顯考量嘅日後攬炒派嘅「議席問題」；「綁架」兩個字更加耐人尋味，大家認為，佢其實係咪想講，「有議席喺身」嘅攬炒派，唔應該被冇議席嘅激進抗爭派搞到「連份工都冇埋」呢？囍雨就喺度諗，何俊仁呢個態度，其實係咪意味住攬炒派與抗爭派嘅決裂？
朱凱廸今鋪會自己「跳崖」嗎？
至於朱凱廸嘅表態，囍雨就話，「杯葛」兩個字同樣可圈可點，係杯葛留任？定係議席照攞，不過杯葛「繼續履職」？真係隨便朱凱廸演繹；而且大家有冇發覺，佢提出所謂「公投或民調」，其實係留有後著，冇講死「肯定唔撈」。咁就好笑啦，今年3月，朱凱廸唔係講過「一定要有跳落懸崖的勇氣」、「等緊呢一日來臨」咩？！嗱，依家就有「跳崖」嘅機會呀！朱凱廸把口咁勇，唔好得個講字，敢唔敢攬住自己嘅議席一個人「跳」先？
誰願放手 VS 如何「接受」
所以如果你問囍雨，攬炒派會唔會「總辭」？喺睇過近日咁多「唔同」表態之後，囍雨更加認為，「辭」嘅可能性極低，低到近乎零！有人計過，做多一年立法會議員，除咗意味住權力之外，「月薪+酬金+各種津貼」，加加埋埋四百萬有多，攬炒派政客咁「精明」，條數點會無識計？佢哋可以與市民為敵、與政府為敵、甚至與中央為敵，但會唔會同錢過唔去？依家佢哋之所以諗完又諗、等了又等，其實要考慮嘅，恐怕只係「誰願放手」嘅問題，同埋點樣將「接受留低」嘅理由、口號包裝得靚啲。據報，攬炒派將會有民調參考作為「去留」嘅一個指標，不過，由攬炒派自己友「做民調」，結果，好似已經「出咗嚟」咁！
請Follow我們的YouTube頻道：
下載我們的手機應用程式，收看第一手精彩內容：
評論