出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
攬炒派初選「水份重、想造勢」?
攬炒派初選「水份重、想造勢」?

攬炒派日前搞咗個所謂「民主派初選」,號稱有超過60萬人參與初選,以證好多市民「反政府」。不過,一個由攬炒派政客搞嘅初選,又點會「無問題」;有網媒記者就用親身經驗踢爆,一個記者喺兩日之內,總共成功投票三次。囍雨就喺度諗,到底呢個初選,有幾多「水份」呢?明知漏洞多多仲要搞初選,攬炒派最終目的係咪又喺度造勢、「造王」?


多個消息稱可重複投票


根據網媒《港人講地》嘅調查報道,有記者連續兩日親身到新界西兩個票站「投票」,唔投由自可,一投就發現,同一個投站,可以投兩次票;去到另一個票站,又可以投票,兩日之內一個人就投咗三次票。其實除咗網媒、媒體做「測試」外,有政界人士都表示收到消息,有人「填錯」身份證號碼,可以投票;有人填錯資料,又成功重複投票。呢啲例子,會唔會只係冰山一角?除咗特登測試同埋「手民之誤」,又會唔會有人「造票」呢?


對於重複投票嘅問題,有份搞初選嘅攬炒派前立法會議員區諾軒稱投票系統會進行「核對」,票站義工亦嚴守要求嚟核對投票人身份,投票有「多重把關,重複投票的情況可以減至零」,但依家事實就係有人已經重複投票,票站義工「嚴守要求」呢個說法,已經值得商榷;至於投票系統會「進行核對」呢個說法,囍雨就會質疑個系統係咪真係「核對」到,同埋就算「核對」到,攬炒派會唔會盡力去「核對」呢?


或涉侵犯私隱


其實,對於攬炒派搞初選,仲有一啲問題囍雨覺得係未解決嘅,例如初選明顯有收集個人資料,搞手戴耀廷雖然表明有投票結果後會銷毁資料,但最後會唔會銷毁,其實外界唔會知;另一個問題,就係有傳媒報道票站人員會查閱網上選民登記資料以「核實身份」,對於非參選人或者候選人咁樣用選民資料,有冇侵犯到個人資料甚至違法呢?凡此種種,不論係選舉事務處以至私隱專員公署,可能都要跟進一下。


問題多、質疑多,一定係攬炒派初選嘅真正結果。其實,大家有冇諗過攬炒派點解要搞咁大場「大龍鳳」?一切一切,根本就係憑聲勢造王,睇嚟為咗攬炒議會,攬炒派都係無所不用其極,未來幾個月,香港一定繼續有爭拗,甚至為咗選舉,又會有人煽動抗爭、反抗中央,市民難以有一日安寧了。


圖片來源:RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

3
超無奈
4
嬲爆
2
無意見

評論