出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
教協涉違章建築 必須嚴查到底
教協涉違章建築 必須嚴查到底

近期唔少新聞都報道關於唔同機構或人士嘅僭建問題,最新例子,就係專門包庇失德教師嘅教協,有三個辦事處涉嫌有違章建築,有專業人士點出有關涉嫌違章嘅建築會構成安全風險。據報,教協副會長、立法會教育界議員葉建源被記者追問事件時,連問題都唔答就走咗去,教協會長馮偉華回應傳媒查詢時,就話「暫未知是否違規,會聘請專業人士了解,若有問題會依法修正」。囍雨就覺得,一個教協,就有三個地方或涉及違章建築,如此其身不正,有關部門一定要追查到底,唔好因為攬炒派、教協夠惡就「怯」!


三個地點 都涉違章


由於教協今次或涉及違章建築的地方「比較多」,所以囍雨都係長話短說喇,簡單嚟講,就係教協位於好望角大廈嘅服務中心,或擅自分間成多個店舖(包括唔同類型診所),可能造成消防安全隱患,而且唔同診所對棄置廢物同排污都有一定要求,唔知係咪合乎相關安全規定;至於教協位於旺角中僑大廈嘅總辦事處,則被指擅自將單位正門嘅外牆拆去,改以整幅玻璃取代;最後,教協喺銅鑼灣嘅服務中心,就被質疑違規喺外牆設置冷氣支架,而且支架殘舊,唔知會唔會有倒塌危機。


對於教協涉嫌違章嘅問題,囍雨必先要指出,將一般商業大廈(好望角大廈)嘅單位「拆分」成多個單位,令其人流大增,萬一發生喺火警上嚟,後果真係不堪設想;再者,教協「分間」單位,如果係無向屋宇署申請改建,咁有系統、規模地分間單位,除咗違法,仲可能牽涉到大廈安全問題,一啲都唔講得笑!


另外,教協位於中橋大廈嘅辦事處如果真係擅自將外牆拆去成玻璃門,一樣有涉嫌違章同結構安全問題。囍雨特別想提及嘅,係教協位於銅鑼灣嘅服務中心,喺外牆嘅冷氣機同冷氣機支架,有無申請固然係問題,其實呢批裝置係極度危險,中心所在嘅街道係熙來攘往嘅行人路,附近有有街市等社區設施,如果有冷氣機、支架墮下,隨時傷及途人,造成死傷。


屋宇署要跟進


有網媒作出跟進報道時,已經將個案轉介予屋宇署跟進,囍雨就覺得,教協唔能夠因為佢哋喺教育界嘅「超然地位」而不受法律規管;再者,每一項涉嫌違章嘅建築,都可能會涉及人命傷亡,屋宇署以至其他執法部門,應該馬上跟進。否則,唔同組織以至政團都自以為有「光環」、唔駛怕,然後「跟隨」,咁社會仲邊有人守法呢? 


圖片來源:港人講地圖片、RTHK


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk


9
嬲爆
3
超無奈
2
無意見

評論