有警員確診新冠肺炎，你會諗到啲咩？覺得婉惜？定係要開香檳慶祝？噚日囍雨睇Facebook，見到無端端見到有人話「今晚好開心，要開支酒飲下慶祝」，開頭囍雨都覺得莫名其妙，跟住再睇落去，原來有新聞報道指有警員確診新冠肺炎。有人仇警，係不爭事實，但如果出現疫症而有警員確診，恨人死，恨人死全家等等，呢啲言論唔理係出於「花生」心態抑或黑心，都絕不能接受！將心比己，如果係自己、自己家人確診仲要被詛咒，大家都會覺得難受一樣！
議員、藝員的涼薄
一般市民、網民「贈慶」，故然係一個唔好嘅現象，但囍雨更側目嘅，竟然有立法會議員都加入「詛咒」行列，人民力量立法會議員陳志全，就高調喺Facebook稱「非幸災樂禍 乃天理循環」，由其言論、發帖時間可以估計到，佢係講緊警察確診（如果唔係陳志全可以公開聲明、否認）；某啲黃絲藝員，甚至係Facebook連環出Post，一時話要慶祝，一時話要去超市「搶香檳」；甚至連民主黨，都喺社交平台話「3萬Thx」（即係暗示想三萬警察都確診？）。對於呢啲言論，囍雨認為可以用「涼薄」兩字去概括！
對於要「慶祝」其他人確診嘅言行，囍雨真心覺得係社會嘅不幸，政見不同甚至對立，係真嘅，呢個矛盾恐怕短期內都無辦法紓解；但政見唔同、位置有別，囍雨覺得絕未至於「要人死」、「要死三萬」；退一萬步講，就算憎警察憎到「想佢哋死」，咁點解要咒人「死全家」呢？即係婦女、小孩都要「死」？當盲反派同佢哋支持者講到自己好正義咁款嘅時候，其實佢哋連基本嘅人格、人性都欠缺，靠呢啲人爭取民主，分分鐘變成「多數人的暴政」。
多一人確診 多一分風險
仲有一點，就係有警員確診，或者「有更多警員確診」都好，乜反對政府班人唔明白一個道理，就係多一個人確診，就多一分社區傳播嘅風險？啲病毒會認住啲警察、警察家人，而唔會傳染俾啲「政見不同人士」；當一班反政府、反警察嘅人話要慶祝，言行其實極度失智。
政治先行，似乎重要過生命，囍雨想講香港依家唔係有人確診新冠肺炎咁簡單，而係成個社會都有「病」，今次事件亦令囍雨想到一句話，叫「他朝君體也相同」，有啲嘢，有啲說話，始終係凡事留一線好！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論