「香港眾志」黃之鋒想參選區議會選舉，社會各界都對黃之鋒參選資格嘅問題表現「高度關注」，有意見認為黃之鋒其實係「獨」派，根本唔應該俾佢「入閘」。今日，有關選舉主任正式DQ（參選提名無效）黃之鋒，黃之鋒批評選舉主任進行「政治篩選和審查」、剝奪佢哋政治權利。今次事件嘅關鍵，在於黃之鋒係咪真心擁護《基本法》、堅持「自決」甚至係咪接受「港獨」為自決選項，喺度不如等廣男喺度同大家分享兩件事，大家再諗下黃之鋒係咪合乎資格參選香港特區嘅區議員啦！

不提倡和支持「港獨」？

根據黃之鋒同選舉主任嘅數問數答，答到最後黃之鋒表示理解並支持由香港眾志提出的民主自決理念，「不提倡和支持香港獨立作為民主自決的一個選項」、「而中國對香港擁有主權，他認為實際上港獨不可成為可接納的選項」，即係話佢支持「民主自決」，但就唔支持「港獨」，呢啲回應，同佢或者「香港眾志」之前嘅說法，好似唔係咁一致！

喺2016年立法會選舉前，「港獨」分子陳浩天因為「港獨」政綱被DQ，之後劉小麗、朱凱廸同「香港眾志」，就發表過聲明「聲援」陳浩天，聲明入面提到聯署者嘅共同政治綱領為「民主自決」，而喺「民主自決」嘅立場上，佢哋定必捍衛「香港獨立作為港人自決前途的選項」；換言之，「香港眾志」（黃之鋒為當中核心人物）支持「民主自決」，而且包含「港獨」選項。值得留意嘅係，當年同樣有發表聲明嘅朱凱廸參選區議會已經「入閘」，點解朱凱廸得而黃之鋒唔得呢？廣男覺得，咁可能係因為黃之鋒仲不斷「闡釋」自決理念，令選舉主任覺得佢信唔過！

黃之鋒曾帶「港獨」標語衝擊政總

如果大家認為一份聲明或者一啲文章，唔足以令人認為黃之鋒係「獨」派，廣男又喺度同大家重溫一單新聞。今年元旦，民陣發起「例牌」嘅元旦遊行，到最後遊行都係暴力收場，部分人無視政總保安阻止，手持「港獨」標語、以暴力強行進入進入政府總部東翼前地，而喺一眾強闖人士當中，竟然有黃之鋒嘅身影，黃之鋒當時「突破防線」攞住寫上「只有兩國，才有兩制」嘅「港獨」標語衝入政總。大家又要諗下，如果黃之鋒唔係「獨派」，點解要攞住「港獨」味道極濃嘅標語衝入政總呢？就如黃之鋒如果覺得理念唔同，會唔會攞住「支持《逃犯條例》修訂」嘅標語去遊行呀？

最近，廣男睇緊一本關於國際關係嘅書，咁啱入面就有提到「自決」呢個概念，作者（全球知名嘅作者）指民族群體（喺香港有「獨」派會強調香港係一個「民族」）經常主張「自決」，而「自決」係指自我決定自身政治命運嘅能力，常常包括建立國家嘅主張，例子包括加拿大嘅魁北克；當香港一班政客成日話要「自決」，但又話「自決」唔包括「港獨」嘅時候，大家又信唔信呢？ 

朱凱廸參選嘅八鄉南選區嘅其他候選人包括黎永添同徐卓然。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app