王永平由「失明」到「失憶」
王永平由「失明」到「失憶」

日前有公務員舉辦集會,期間公務員事務局前局長王永平上台發言,「豪情壯語」稱公務員守則提到嘅「政治中立」,係佢10年前寫嘅,真正意思絕對唔存在向個人忠誠,而係向體制、制度同整個社會忠誠,據報獲得在場人士「一片掌聲」;不過之後就有人踢爆,原來當年王永平喺立法會解釋政治中立原則嘅時候完全唔係咁講,質疑王永平說法前後矛盾。喺呢度,不如等廣男同大家回下帶,用事實說話,睇下王永平當年點講法。


王永平曾表明公務員應對特首盡忠


根據立法會紀錄,時任公務員事務局局長王永平喺2004年6月9日回答議員質詢時曾經講過:「公務員政治中立,包括以下主要元素:(一)公務員的政治中立,建基於效忠政府的責任;(二)所有公務員應對在任的行政長官和主要官員盡忠;(三)公務員必須衡量各項政策方案的影響,在政策制訂過程中坦誠而清晰地提出意見;(四)在政府作出決定後,不論個人立場如何,公務員應全力支持,把決定付諸實行,並且不應公開發表個人意見;以及(五)公務員應協助主要官員解釋政策,爭取立法會和市民大眾的支持。」換句話說,王永平話公務員唔係對個人包括特首盡忠,根本就係說法有誤而且前後矛盾,今天的我打倒昨日的我!


廣男喺度請大家留意下第四同第五點,就係政府作出決定後,公務員應該全力支持同埋要協助官員解釋政策、爭取立法會同市民大眾支持;根據王永平喺2004年嘅說法,當日集會人士已經完全違反咗政治中立原則,但王永平上到台竟然講啲嘢完全違背自己當年嘅說法,大家認為佢係選擇性失憶,定另有居心呢?


曾表示看不見「示威者掟磚」


如果你問廣男,廣男就覺得佢咁做,極可能係想攻訐政府,陷政府於不義。唔知大家仲記唔記得,之前6.12有人暴力衝擊立法會,掟磚、掟鐵枝同雜物等等,王永平竟然喺電台節目話「雖然警方係展示咗有磚頭啊、削尖鐵枝啊,但係我無見到、係畫面無見到有人使用」、「相反我見到好多片段係一班警察向手無寸鐵同無反抗的人,瘋狂地打」,完全無視暴徒嘅暴力行為,當時已經有人質疑佢選擇性失明偏幫暴徒;依家佢又「發功」,講到公務員「反政府有理」無問題咁,其實佢嘅用意已經相當明顯,就係企喺反修例人士一邊,營造公務員可以「反政府」嘅錯覺。


如果廣男無記錯,王永平應該係仲享受緊退休公務員嘅福利,例如長俸,佢仲算唔算係公務員呢?佢係咪都受公務員守則約束?如果一個退休公務員享受緊政府福利,但又一邊全力、公開地「反政府」,大家話應該點處理? 佢個人嘅忠誠又去咗邊呢?


原圖:RTHK

21
嬲爆
3
超無奈
1
無意見

評論

你可能感興趣