出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
陪你違法才是愛?
陪你違法才是愛?

香港社會近排因為政治爭拗而加深撕裂、對立,喺呢種氛圍下,囍雨有時都好擔心,時下部分年輕人嘅思想觀念究竟扭曲到咩程度。有此憂慮係因為,囍雨睇到呢兩日網上流傳一條自稱「90後」拍嘅片,一位年輕人宣稱喺之前嘅大型警民衝突入面,「點解九成五都係年輕人、點解佢哋嘅父母唔在場?」佢嘅結論係「你哋嘅父母根本無愛過你」。囍雨睇完真係又嬲又驚,今時今日居然仲有呢種如同「文革式」嘅批鬥父母,唔通啲年輕人去衝擊去犯法,父母都要陪埋一齊去?唔陪就係唔愛自己嘅仔女?呢啲究竟係咩歪理?囍雨都想講句:年輕人,你會唔會太離譜啊?

 

喺條片裡面,果位後生仔用咗好多偏激、甚至不堪入耳嘅言論去「批鬥」父母。例如話「香港嘅父母由個仔出世嗰刻就不停咁索取佢」、「每一分每一秒都喺到計算緊可以喺仔女身上得到啲咩利益」、「年輕人一出世根本就係畀社會同你班父母唔同程度咁強姦」、「依家年青人反抗仲要畀你哋指指點點」、「一個無條件愛仔女嘅父母,唯一本能反應係睇到自己嘅仔女畀人開槍射,只會以身擋粒子彈」云云,講到一半,仲叫父母「收皮啦!」。囍雨覺得,竟然有啲人咁樣批鬥父母,實在令人髮指。

 

極端扭曲的是非觀


顯然,呢位「90後」完全信奉自己嘅一套「歪理」,囍雨擔心嘅係,喺依家嘅社會氛圍下,呢種諗法可能會長期存在於一部分香港青年嘅心裏面,但諗深一層,根本就係一種極端扭曲嘅思想觀念,如果任由其不斷傳播、蔓延,對香港社會絕非好事。事實上,喺過去幾次警民衝突入面,當有少部分人手持鐵枝、磚頭襲擊警察,有人攔車堵路,有人包圍警察總部、粗言穢語辱警、欺凌,囍雨想請大家睇清楚,呢啲唔係和平示威,而是暴力違法。年輕人,係咪都應該好好反省下自己做過啲乜呢?依家仲想父母或者其他人嘅父母同你哋一齊「衝」?呢個係咩思想?

 

無條件的愛唔等於縱容違法


當社會上一輩普遍相信要守法、和平表達意見嘅時候,部分年輕人以「以身試法」為「榮」,歸根究柢,都係因為啲政客煽動「違法達義」、「勇武抗暴」歪理,蒙蔽咗一部分青年,以為有政治訴求就可以無法無天、為所欲為,甚至因為要「反抗」,所以父母都應該出嚟幫自己「擋子彈」。囍雨唔知呢位「90後」有幾大,係咪真係無感受父母嘅愛、唔明白養育仔女嘅過程中父母要犧牲幾多,但囍雨要講,真正嘅愛,除咗供書教學,更加需要導人向善;父母俾仔女無條件嘅愛,唔等於包括縱容違法,甚至陪埋你一齊去做犯法嘅事。囍雨真係好想知,如果有一日,當有啲年輕人因為犯法而要坐監、承擔罪責,會唔會又掉轉頭怪罪自己嘅父母當初點解唔阻止自己呢?

 

囍雨好希望,時下嘅年輕人都可以好好諗一諗,究竟希望我哋嘅社會變成點,而唔好人云亦云、聽乜信乜。至於聽聞有盲反派政客話呢條片係「陷阱」、甚至講到係建制派自己拍出嚟炒作咁款,囍雨真係好奇,係咪只要不利於盲反派「發揮」嘅嘢就都係「造假」嘅呢?咁搞法,啲盲反派政客又真係永遠都可以諉過於人。大家明㗎喇!


原圖:Facebook

15
嬲爆
1
驚訝
7
唔係呀哇

評論