正在德國「流亡」嘅旺角暴動案逃犯黃台仰近日異常高調，一時喺外媒撰文反對《逃犯條例》，一時又出席論壇公開批評中央、港府，仲接受唔同媒體嘅訪問，成個「反華生招牌」咁；喺佢眾多言論當中，好多人都留意到佢早排話自己唔再提倡「港獨」，改為關注香港人權云云，唔知佢係咪因為畀人鬧得太犀利嘅關係，佢日前接受《生果報》專訪嘅時候，話自己唔提倡，唔代表唔支持（港獨），仲話到而家都認同「以武制暴」嘅概念。言下之意，即係佢棄保潛逃緊都仲支持「港獨」同「以武制暴」，人在外地，依然一心搞「策反」、「反華」？

唔「獨」又「獨」？

當黃台仰話自己唔會再提倡「港獨」，話要關注香港人權狀況嘅時候，囍雨估計係因為人在外國、正受庇護，如果仲搞分裂祖國觸及西方國家的底線，分分鐘德國都「保佢唔住」，所以就180度改口風啦；但唔知係咪俾啲支持者鬧嘅關係，佢日前接受《生果報》專訪，又話自己唔提倡，唔代表唔支持「港獨」，仲話至今仍然認同「以武制暴」，簡單嚟講，即係要繼續搞香港、搞中國啦！

全方位「反華」

囍雨就覺得，黃台仰除咗仲係「港獨」派之外，佢另一個大問題就係佢近日嘅言論，唔止係「反共」，直頭係「反華」！以佢之前喺《紐約時報》篇文為例，完全針對中央、港府嚟抹黑。《逃犯條例》修訂，佢就抹黑成香港官員有「前所未有」嘅權力拉人兼送上內地，講到好似「綁架合法化」咁；盲反派拉倒政改、搞「佔中」，佢又想入政府數；旺角暴動，佢竟然可以講成係「和平示威」，之後仲話要政府釋放「政治犯」。一句講晒，就係將所有嘢調轉嚟講，講到犯法「有理」，政府執法先係「唔啱」咁款，可以話係全方立針對中央、港府。

事實上，政府推《逃犯條例》修訂，盲反派搞事之際，外媒、黃台仰剛好在此時宣布得到德國提供庇護；六四三十周年，黃台仰就出席論壇，如果黃台仰背後無Boss，囍雨真係唔信！既然依家黃台仰極可能已經成為外部勢力嘅反華「棋子」，社會各界應該做嘅，就係盡全力促請德國將黃台仰引渡番香港，等佢接受番佢應得嘅刑事審訊！

原圖:文匯報