戴耀廷真誠地卸責
戴耀廷真誠地卸責

雖然違法佔領發起人戴耀廷已經身在監牢,但佢依然不忘向社會散播歪理,不停寫文為自己「辯解」,甚至講過自己會繼續「犯罪」;今日,戴耀廷又喺《生果報》發表文章,喺度「商榷」公義嘅問題,仲話法律體系必須接納多元嘅公義觀,睇下「公民抗命」者係咪真誠地相信自己係為公義而違法。廣男就認為,戴耀廷有幾「真誠」地為公義好難講,但佢同其他「佔中」犯真誠地「走數」,肯定就毫無懸念!

 

又想質疑法庭?

 

綜觀戴耀廷呢篇題為〈獄中書簡:公民抗命的價值〉嘅文章,大意就係話公義係抽象概念,法律體系係用一套公義觀去判斷公民抗命,會令法律體系喪失咗透過「公民抗命」去自我糾正嘅能力,又繼續喺度拗「公民抗命」點先為知「合乎比例」,稱判斷「佔中」時應該睇下佢哋當時係咪真誠地相信行動「合乎比例」云云。一言而蔽之,就係戴耀廷到呢一刻仲想同社會甚至法庭「拗數」囉!

 

廣男認為,當戴耀廷講到「公民抗命」、「真誠信念」等問題時,大家真係要問下佢以至其他「佔中」犯,如果佢哋真誠地為公義,又聲稱自己係「公民抗命」嘅時候,乜「公民抗命」有主張過「公民抗命」者唔認罪、「走數」咩?戴耀廷係咁講「公民抗命」係可以減刑嘅理由,但又唔見佢講「公民抗命」要求違法者真誠地承擔罪責,擺到明就係扭曲咗「公民抗命」,將佢變成「犯法唔駛認罪、找數」嘅歪論。

 

戴耀廷早揚言要「萬人佔中」

 

至於「合乎比例」嘅問題,戴耀廷似乎到而家都仲想拗佢哋嘅行動係「合乎比例」,或者佢哋當初策劃「佔中」果時計劃係「合乎比例」;廣男又要喺度提提戴耀廷,佢由2013年1月開始,所煽動嘅「佔中」係「萬人佔中」、「迫爆中環」,一個想煽動數以萬計嘅人犯法,仲要係迫爆核心商業區嘅違法行動,點樣稱得上係「合乎比例」?戴耀廷本人甚至佢嘅同黨一早就諗住癱瘓香港核心商業區迫政府甚至中央讓步,根本由佢構思「佔中」開始,預設嘅行動就唔可能「合乎比例」或者影響輕微而令公眾接受。

 

據報,戴耀廷同另外兩位違法佔領發起人陳健民以及朱耀明已經決定就「佔中」案上訴,喺案件可能好快又會進入司法程序嘅時候,戴耀廷不斷公開「出口術」喺有意無意之間抨擊法庭判決,到底佢係真心想評論事件,定係另有所圖,例如製造「佔中無罪」嘅社會輿論,上訴案未審前先喺輿論戰「贏一場」,相信大家心中有數。


原圖:中新網


2
支持
2
好正
1
無意見

評論