再盤點李卓人敗因:因為「星級」支持者冇品!
再盤點李卓人敗因:因為「星級」支持者冇品!

尋日囍雨為大家Fact Check咗李卓人班助選團,喺剛過去嘅立法會九西補選期間做過啲乜污糟邋遢嘢,令到李卓人備受溫和理性嘅香港市民唾棄。見到尋日篇文成績唔錯,囍雨今日決定窮追不捨,繼續同大家重溫返一啲李卓人團隊嘅惡行,今日不如就講吓支持李卓人嘅「星級」支持者,同大家講解一下呢班咁嘅「政治藍血人」係點樣幫倒忙,令到本來已經唔討好嘅李卓人,變得更加乞人憎!


「冇品」兼「吹水」 公民黨幫手「趕客」


用得「政治藍血人」去形容,相信大家都已經知道囍雨想講嘅係目空一切、自高自大嘅「大狀黨」公民黨。公民黨喺今次九西補選度有咩咁乞人憎呢?冇乜嘢,咪就係「冇品」兼「吹水」之嘛;為咗唔想大家覺得囍雨係印象式批評,而家就逐一點名畀讀者重溫呢班人嘅劣行。首先,梗係要講公民黨現任黨魁楊岳橋啦!


楊岳橋有咩咁衰呀?兩個字:「冇品」。記得喺選舉前幾日,楊岳橋喺個人社交網站轉發咗一條新聞,條新聞係乜已經唔重要,最卑鄙嘅係楊岳橋竟然加咗一句評語:「有頭髮邊個想做檢基?」擺明就係取笑馮檢基「地中海」髮型、恥笑對方嘅外貌,同時想誘導支持者一齊大玩網上欺凌,而攻擊嘅,單純只係馮檢基嘅外觀!


揶揄馮檢基外表 楊岳橋言論極卑劣


到底一個政客要有幾劣質,先可以拎選舉對手嘅外表嚟恥笑?先唔好講大部份「地中海」髮型嘅人士,都唔係出於自願去整呢種髮型;當一個政客只係著眼於對手嘅外表時,好明顯佢已經將民主選舉裡面「比理能、比能力、比政綱」嘅金科玉律拋埋一邊。原來,喺公民黨黨魁心目中,「選舉」等如「選美」,參選人嘅外表原來遠比能力重要,楊岳橋完整咁示範公民黨心目中嘅選舉模式,香港人真係「受教」、「受教」。


公民黨現任黨魁以貌取人,前任黨魁梁家傑又點呢?嘩,呢位前黨魁、現主席,同楊岳橋都不遑多讓,選舉日前拍咗一條片,大意就係話「如果李卓人輸咗,香港獨立關稅區一定不保」。聽到梁家傑呢位資深大律師咁講,囍雨除咗目瞪口呆之外亦真係唔知講乜好,所以決定引用網民評語去反駁呢啲咁失常嘅言論,包括:「不如話飯民輸咗地球會毀滅丫笨」、「如果李卓人輸咗,曼聯前四位置一定不保……」、「李卓人一輸,恒生指數大跌,連累道指急插,外星人就乘機侵略地球」。


同「豬隊友」切割才有生機


李卓人喺九西補選度點解輸,相信社會仍然有排解讀;囍雨喺度就奉勸反對派,除咗呼籲佢哋放下事事對立思維,認認真真為香港謀發展之外,更重要係認清身邊乜嘢人係「豬隊友」,好似「香港眾志」黃之鋒、「人民力量」譚得志呢啲專門玩暴力衝擊兼推推撞撞嘅,當然要立刻同佢哋切割啦,好似公民黨咁呢班平日道貌岸然、斯斯文文嘅政客其實都要小心喎,即係平日睇落正正常常嗰班呢,選舉期間好可能就係最趕客嘅一批。公民黨?哈!哈!哈!


圖片來源:楊岳橋個人社交網站

40
嬲爆
7
搞笑咩
15
好好笑
9
驚訝

評論

  • Andy Ho
    Andy Ho
    5年前
    0 回應 檢舉
    揚惡矯反中亂港佢就叻。畜牲何來會有品?

    沒有更多評論

    沒有更多評論