屈你紅底又如何
屈你紅底又如何

立法會九龍西補選提名期開始,各路人馬都紛紛宣布參選或報名,前民協成員、前立法會議員馮檢基宣布參選,盲反派各路人馬包括盲反派媒體就「瘋狂屈基」,一時砌佢𠝹票,一時又話叫佢「臨崖勒馬,以保晚節」;噚日,囍雨慣常地上Facebook,仲見到同《生果報》同屬一個傳媒集團嘅《壹週刊》對馮檢基「起底」,並得出馮檢基同左派富商有密切關係嘅結論。咦咦,咁盲反派為咗攻馮檢基,已經去到一個話馮檢基係「左派」或者親「左派」嘅地步喇,但實情係咪咁先?


左派富商向民協出租單位?


根據《壹週刊》嘅「起底」報道,話左派富商葉國華同香港「民主派」有一定關係,其中一個理由就係喺90年代馮檢基擔任民協主席期間,民協獲得葉國華出租油麻地一個單位作為總部,一直沿用至今;而馮檢基亦曾向傳媒透露,民協總部會址一直獲葉國華以「友情價」出租,多年來租金未有變動。咪住先,如果根據《壹週刊》嘅「邏輯」,租左親建制單位嘅人或者組織就係「親建制」或者「左派」,咁《壹週刊》計正係話緊民協係左派或者親左派喎,佢係咪呢個意思呢?而且馮檢基已經退出咗民協,個會址已經唔關馮檢基事啦,況且租人哋個單位,係咪就等於同某富商有政治聯繫或者立場相近,囍雨都好懷疑。


更值得懷疑嘅,係葉國華除咗租地方畀民協之外,其實亦有租過地方畀民主黨前身之一嘅「匯點」,難道一班盲反派人士又同呢位富商「關係密切」?前「匯點」嘅成員無論而家喺邊個政治陣營,係咪都係同左派關係「千絲萬縷」呢?講到呢度,可能大家都同囍雨有相同感覺,就係《壹週刊》為砌馮檢基,不惜攞啲看似「有料到」,實則得啖笑嘅嘢嚟話馮檢基;但大家要問一句,如果馮檢基係親「左派」甚至直頭係「左派」,咁民協成員、好多前「匯點」成員咪全部都同馮檢基一樣?


盲反派趕盡殺絕 過猶不及


基於工黨劉小麗出選九龍西嘅勝算,盲反派要集中票源囍雨可以理解,但而家盲反派對劉小麗以外嘅盲反派人士趕盡殺絕,囍雨覺得佢哋真係做多咗啦;如果囍雨係九龍西選民,聽到盲反派話自己選情危急,懇切叫大家集中票源,係聽得落耳嘅;但佢哋而家瘋狂狙擊自己人,選民看在眼裡,都會覺得佢哋肉酸,對劉小麗都打埋「折扣」啦。凡事都係適可宜止比較好,盲反派應該記住「過猶不及」呢四個字,有啲嘢做得太多,就唔好睇架喇!


已報名參選立法會九龍西補選嘅人士有工黨劉小麗同前立法會議員馮檢基,另外食物及衛生局前政治助理陳凱欣同沙田區議員陳國強亦已經宣布參選。


原圖:RTHK

8
唔係呀哇
4
驚訝
3
無意見

評論