去信美國國務院 陳浩天刷「存在感」
去信美國國務院 陳浩天刷「存在感」

由於大肆宣揚、煽動「港獨」,「香港民族黨」正面臨取締,而佢哋嘅召集人陳浩天可能去完香港外國記者會(FCC)過份「亢奮」,竟然去信美國總統特朗普,要求美國制裁香港,搞到自己畀全城怒插,但係美國「眼尾都唔望佢一眼」,美國駐港總領事館亦回覆傳媒話香港仍有足夠自治;陳浩天「一計不成,又生一計」,噚日喺Facebook話自己已經去信美國國務院,再要求人哋取消《香港政策法》,話香港政制日漸背離民主云云。囍雨就覺得,陳浩天同「民族黨」所受關注越嚟越少,陳浩天咁做除咗玩嘢,好明顯係喺度「刷存在感」。


DQ案與民主無關


根據陳浩天畀美國國務院嘅信件,提到有立法會議員被DQ、佢自己就被禁參選立法會等,均為香港背離民主嘅證據。立法會議員被DQ,真係關民主事咩?幾個前立法會議員被DQ,好似係因為佢哋宣誓玩嘢,違反咗《立法會條例》以至《宣誓及聲明條例》所以喪失議員資格喎,有人唔守法被DQ,根本就完全唔關民主事。至於陳浩天攞自己無得參選立法會嚟講就仲好笑,佢同「民族黨」嘅理念係「香港獨立」,即係陳浩天無可能會滿足到參選立法會需要「效忠特區同《基本法》」嘅法律要求,咁點畀你選呢?畀你選咪違反法治精神囉?


囍雨覺得,陳浩天為咗搞「港獨」(正確嚟講係搞香港先啱),已經去到語無倫次嘅地步;今次佢去信美國國務院,話《香港政策法》下美國可以向香港出口涉及重要技術嘅商品,而由於香港成為中國嘅「傀儡政權」,中國將能竊取有關重要技術。嗱,陳浩天呢個陳述,囍雨覺得係一個非常嚴重嘅指控,請問陳浩天咁講有冇證據?如果冇,就係「老屈」,砌香港政府同內地「生豬肉」!

 

屢次「增加」自己罪證

 

打從陳浩天去FCC播「獨」開始,到佢而家「一而再」叫美國制裁香港,可以話一次又一次證明畀全世界睇佢擺明係要搞「港獨」、搞亂香港甚至要危害國家安全,不斷增添「民族黨」係「非法社團」嘅罪證。除咗政府要堅持依法辦事之外,市民亦都應該要睇清楚,所謂「港獨」派,根本就係一心要搞亂香港,信佢哋一成都唔掂呀。 


原圖:Takungpao

7
好好笑
2
搞笑咩
5
嬲爆
4
無意見

評論