剛剛過去嘅七一遊行，場面氣氛參加人數統統極之冷清，主辦單位民陣狂吹話有50,000人參加，不過事實當然係冇呢個數啦，其中香港大學用科學化計算，結果係民陣公布嘅一半左右，即係全日有26,000至33,000人。嗱，講清楚先，囍雨唔係要恥笑七一遊行人數少，呢篇文要批評嘅，只係嗰班最喜歡用「大話」、「煽動」、「吹水」去撈取政治籌碼嘅政客，靠吹大集會人數、靠講大話去蠱惑民心，呢啲咪就係香港反對派真面目囉。

民陣長年「報大數」 手法卑劣

眾所周知，今次已經唔係民陣第一次吹水七一遊行嘅參加人數，記憶中比較離譜嘅一次，係2012年嗰一次，當年民陣吹到有成400,000人參加遊行，但港大學者推算參加者只係介乎98,000至112,000人之間，而警方當時就話遊行最高峰時只有63,000人。不過真係對唔住，由於民陣每一次都係報大數，所以請恕囍雨冇能力、亦冇興趣一一列舉出嚟，大家有個概念，知道呢班人年年講大話就得喇。

除咗七一遊行，由支聯會主辦嘅六四集會，近年都不時被人踢爆報大參加人數。我哋先睇睇港大科學化嘅計算方法，該校學者指出，維園硬地足球場面積大約係29,077平方米，以每平方米可以坐度2.8個計算，維園硬地足球場最多可以坐81,415人左右。大家記住，學者講到明，如果真係坐咁多人，現場肯定「人迫人」，人同人之間幾乎冇空間可言。

支聯會同樣「愛鬥大」

好喇，咁到底支聯會呢幾年公布嘅參加人數係幾多呢，大家睇睇：2013年：150,000人、2014年：180,000人、2015年：135,000人、2016年：125,000人、2017年：110,000人、2018年：115,000人。大家睇唔睇到有咩問題呀？係囉，就係每年都超過港大計算出嚟嘅「最高可容納人數」囉，咁到底啲多出嚟嘅人去咗邊呢？多幾萬人出嚟，至少肯定會「佔領」埋銅鑼灣或者天后部份地方啦，但歷年都唔見有咁嘅情況喎！

其實答案好簡單，咪又係「報大數」囉！為咗達到盲反政府嘅終極目標，反對派一切做人嘅基本操守都可以唔顧，年年講大話、年年呃市民，試問呢班人仲有乜嘢誠信可言？自己都做唔好，仲有乜嘢資格批評人哋？為咗反政府而大話連篇、文過飾非，「道德高地」已經蕩然無存啦，仲有咩資領導市民反政府呀？彈開啦！

原圖：RTHK