素來標榜「和平、理性、非暴力」嘅民主黨，佢嘅立法會議員許智峯，日前竟然涉嫌喺立法會搶女政府人員手機，據報仲要係為咗「搶」手機，竟然幾乎同對方面貼面，作出類似環抱嘅動作，仲要係有拉扯果隻。事隔差唔多三十個鐘，許智峯終於行出嚟交代，話自己當時係喺「冇同意」之下「取去」女政府人員手機。囍雨就唔係咩法律專家，落唔到咩法律判斷，但許智峯作為讀法律嘅立法會議員，佢會唔知自己極有可能犯法？唔好呃人啦！

大家細細個嘅時候間唔中都會頑皮一下，有時啲大人都會同我哋講，「小朋友，你唔可以冇問過人就攞人哋啲嘢架，不問自取，是為賊也」，所以大家都會有個概念，如果對方唔同意而攞咗人啲嘢，就算唔叫搶，都可能係偷！偏偏，許智峯呢個「榮譽法律學士」，首先話自己「獲得」，之後又話自己「取去」、「攞咗」個電話等等，囍雨真係要問下許智峯，你讀咁多書，仲要係讀法律，你連自己係咪「搶」嘢，都唔識判斷呀？

死口唔認搶手機

對於許智峯呢種「語言偽術」，囍雨覺得可以有兩種解讀嘅，第一就係許智峯覺得自己「做得啱」，所以唔存在搶唔搶、犯唔犯法嘅問題（但如果係咁佢就唔駛道歉啦！）；第二種解讀，就係許智峯作為一個「榮譽法律學士」，佢都知自己闖咗禍，為咗避免之後嘅刑責，佢而家就戴定「頭盔」先，死都唔肯認自己搶人手機，第時如果畀人告，而佢又唔想認罪，都可以繼續話自己只係「攞」，唔係搶。但咁講法，許智峯依然係非常有問題，如果佢真係咁熟法律，佢就唔會咁明目張膽喺立法會涉嫌犯法啦，除非佢瘋狂到一個點，係佢熟法律，但又控制唔到自己搶人嘢啫！

許智峯「犯案纍纍」？

睇番許智峯嘅從政「往績」，其實佢有暴力傾向，係有跡可尋嘅，例如佢2014年喺區議會會議就試過涉嫌踢傷保安，又試過喺區議會無喇喇「發難」，衝去熄咗人枝咪；到佢成功晉身立法會，都試過喺會議廳因為要衝擊而涉嫌打保安，事後亦有工會出嚟譴責佢。今次又話因為懷疑被侵犯私隱所以「攞」人電話，唔通又係「違法達義」？咪玩啦，果個時候許智峯應該喺會議廳開會架嘛，人哋記低你喺唔喺大樓、喺唔喺會議廳咁叫私隱？好牽強啫！

睇睇下，其實許智峯係咪入錯政黨呀？民主黨自己話好和平、好理性同反對暴力架嘛！佢似乎唔係好適合個黨同埋做議員囉！ 

原圖：Takungpao