今日社會最關心嘅事，廣男相信唔係咩國家大事，亦都唔係個別明星嘅戀事，而係黃子華「棟篤笑」賣飛，好多人唔係親身去排隊買飛，就係怒對住個售票網按refresh。廣男有個同事直頭請埋年假去買飛，排咗幾粒鐘都未買到，而廣男由於唔想無咗一日年假嘅關係，只好「低調地」喺公司電腦前面間唔中refresh一下；可惜，玩咗幾個鐘，連入去揀日子、揀飛嘅畫面都入唔到，廣男真係想講句，「唔好咁啦，我都係想睇下黃子華啫！」

黃牛勝於一切？

老實講，喺香港要買飛睇演唱會、「棟篤笑」，都係一件幾灰嘅事。首先，係包括唔知道數量嘅內部認購門票；通常啲show都係有贊助商、要用指定信用咭優先買飛嘅。當大家冇某一信用咭，唔緊要，等佢公開發售囉！但公開發售嘅問題可能仲大，第一，如果你自己去排隊，要排贏班黃牛黨機會好渺茫，因為你就算請日假去排隊，人哋幾日前就排緊啦；好啦，上網買得唔得先？得，不過個系統好難登入到，入到又未必買到，買到就真係「時運高」。

喺香港地要買飛睇show，尤其係比較出名藝人嘅show，變得愈來愈困難，有朋友講笑話，咁係因為大家慣咗乜都「炒」一餐，既然有「炒」黃牛飛嘅需求，咁就自然有人製造呢個市場出嚟啦（其實廣男覺得係調番轉，有人掃晒啲飛，製造呢個「缺貨」嘅跡象就真）；喺呢個情況之下，政府或者搞show嘅主辦單位，係咪可以做番啲嘢呢？

買門票 實名制？

有位經常去唔同國家睇show嘅老友同廣男講，其實有啲國家演唱會賣飛，首先需要有個login account，入面有晒個人資料，而全場嘅票無分平貴，睇你抽中咩位（香港係唔係行呢套，可以待商榷），到買到飛又真係入場睇show嘅時候，會有人喺門口查護照或者其他身份證明文件，雖然唔係查得好嚴謹，但查到嘅話會連本身用開嚟買飛嘅帳戶會畀人取消或者停權，而冒認他人身份入場嘅，分分鐘犯刑事，主辦單位會報警處理，所以黃牛飛呢樣嘢，係某啲地方根本就唔存在！

港府或者主辦機構係咪要咁做，廣男就唔知喇！但我哋呢亭蟻民，買唔到樓都算啦，係咪連買飛睇場show、減下壓都咁困難？唔好咁啦，我哋想睇show啫！

原圖：城市售票網截圖、wenweipo