立法會議員鄭松泰因為倒插國旗、區旗被判侮辱國旗、區旗罪成，立法會亦有委員會跟進事件，日前裁定鄭松泰係行為不檢、違反誓言；其實，成件事有晒電視直播又有法庭判決就back up，鄭松泰根本就係水洗都唔清，不過唔知點解佢依然要死撐，一時話建制派搞流會，一時又話建制派將國旗、區旗插喺杯筒，講到自己畀人政治打壓咁。講咁多嘢，廣男剩係想問鄭松泰一句，唔好理其他人做過啲乜，法庭已經判定佢倒插國旗、區旗係屬於「侮辱」，亦裁定佢係犯咗刑事罪行，咁到底仲有咩好拗先？

鄭松泰轉移視線

今日聽電台節目，聽到鄭松泰接受訪問嘅時候，佢似乎點都唔肯承認自己有做錯，一時話自己當時行為係因為唔認同建制派製造流會，令到議會唔能夠進行宣誓；轉頭又話如果建制派咁重視國旗、區旗，點會將國旗、區旗插喺杯筒度，總知就人人都有錯、千錯萬錯，只有明目張膽侮辱國旗、區旗嘅佢冇錯，試問咁樣合理嗎？

喺呢度，廣男要認真講一句，鄭松泰所謂嘅解釋，其實統統都係藉口！佢可以唔滿意建制派因為唔畀辱華、搞「港獨」嘅人宣誓而搞流會，佢都可以質疑點解國旗、區旗就咁插喺度，但咁唔代表佢本人可以用倒插方式去侮辱國旗同區旗！套用佢嘅邏輯，如果佢或者其他盲反派有咩唔滿意，係咪都可以瘋狂侮辱自己國家、特區嘅象徵？呢種抗命邏輯，同日前公然喺台灣搞「港獨」嘅港大「學者」戴耀廷可以話係如出一轍，而更加相似嘅係兩個都敢做唔敢認，被法律追究就話人「政治打壓」！

最好回應：道歉

負責調查鄭松泰嘅委員會已經決定動議譴責鄭松泰，到時如果有三份之二在席議員同意譴責鄭松泰，鄭松泰就會連立法會議員都冇得做。不過咁，廣男覺得事情仲係挽救餘地嘅，即係如果鄭松泰真係想保位議席，又清楚明白自己係唔應該侮辱國旗、區旗，佢好應該向立法會其他議員同公眾道歉，做番個有承擔嘅人，不過以一眾盲反派「走數」往績，想佢哋認衰兼道歉？好難囉！

原圖：takungpao