戴耀廷又抹黑法治 為自己遮醜
戴耀廷又抹黑法治 為自己遮醜

戴耀廷等「違法佔領」發起人被起訴「公眾妨擾」相關罪名,本來班政客走數都係意料中事,但「無賴」到好似戴耀廷咁想走數不特止,近期仲成日喺度唱衰政府,話政府嘅管治係「威權」統治,總知唔理自己有冇罪,都抹黑咗政府同法治先。今日,囍雨又見到戴耀廷寫文,話政府係「虛偽的香港威權」;講真,要講虛偽,乜有人虛偽得過話自己犯法會找數,最後走數仲要反過來抹黑人嘅戴耀廷先生咩?

扭曲法治 枉為人師

作為一個法律學者,囍雨覺得戴耀廷嘅言行經常有違於法治精神,好似佢寫文話國家或者政府「僭建」咗宣誓嘅規定咁,佢作為一個教法律嘅大學教師,佢會唔知道《基本法》以至《宣誓及聲明條例》一早寫明立法會議員要依法宣誓?佢唔係唔知,而係政府唔執法佢哋班盲反派就以為可以踐踏法律,到政府執法,就話政府「有權用盡」。呢種犯咗法仲要大聲夾惡話番人轉頭嘅氣焰,真係非常得人驚!

無論係刑期覆核「雙學三人」、DQ「自決派」或者「港獨派」以至檢控違法佔領主事者,基本上政府都係依法辦事,戴耀廷話政府將法治扭曲成「只是嚴格按法律規定去做」,咁即係話政府執法都唔得?唔講咩高深嘅法律概念,一個政府最簡單嘅功能,就係根據法律處理違法、破壞社會嘅人,戴耀廷好明顯係因為自己被告,所以就瘋狂攻訐政府!

為自己遮醜

表面上,戴耀廷係為盲反派發聲攻擊政府,其實佢做嘅、講嘅都係為咗自己,事關佢而家因為違法佔領畀政府告緊,喺佢唔可以直接批評法庭嘅情況下,佢不斷出口術攻擊政府、法治,真係冇得輸架,點解?如果法庭最終考慮佢哋成日強調嘅「公民抗命」元素,佢就算被判有罪都可能判得輕啲;如果法庭判佢有罪又重判佢,佢近期係咁洗公眾腦,就係想話畀人聽佢哋被告只係「政治打壓」、「政治檢控」,所以佢不斷出口術,真係咩結果佢都無蝕。唯一樣衰啲嘅就係,成日話自己「公民抗命」、承擔罪責,原來自己只係走數、賴皮嘅政客,真係睇到人得啖笑。

仲有一點相當可笑嘅就係,戴耀廷話政府「選擇性檢控」,言下之意係咪想叫政府一視同仁,告埋果幾十個未被撿控嘅違法佔領主事者呢?戴耀廷「曲線真係要講明」先得呀!

原圖:大公報

評論