作為一個I.T.人，廣男最鍾意當然係睇科技新聞。尋日啱啱睇到，Amazon Go日前已經正式喺美國西雅圖開幕，呢間店舖最特別之處，就係裡面並冇職員，客人行入去，透過Amazon Go專屬手機應用程式，就可以直接走到貨架拎所要嘅嘢，跟手直接離開間舖，係唔係好「開心」呢？聽落係好似好新鮮，但大家又知唔知道，其實內地舊年已經有「無人商店」出現，而且仲運作得相當成熟呢？

內地早已經有無人商店

唔信？真架。廣男舊年去北京出差，當地同事已經帶我去過呢間「無人便利店」見識見識。運作方式同Amazon Go有唔少差別，喺北京，係要先登記同註冊「人臉識別系統」，成功後，一行入間舖頭，「人臉識別系統」就會顯示你資料，要畀錢、要買嘢，自己一手包辦不成問題。

至於上海其實都有「無人商店」喎，不過形式就有少少唔同。廣男呢間就親身試過，入到去間「無人便利店」，格局同一般便利店係冇分別，你揀完所要嘅貨品後，只要將啲貨放上電子收銀台，電腦就會話你知要畀幾錢，之後自己係用支付寶或者微信支付等等就搞掂㗎喇。

香港科技應用要「追落後」

可能有人會問，喂，唔畀錢得唔得先？廣男可以話你知，唔係唔得，不過極大機會走唔甩囉。因為當你唔畀錢行到去門口，店舖會即時播出警告錄音，提醒你畀錢或者放返低件貨；若然你夾硬走人，便利店公司當然會收到通知，你個樣你會被閉路電視發到去警察嗰度。咁你話，值唔值得咁樣「博」先？

呢類店舖之所以特別，係因為整體佈置同舊式便利店完全一樣，並唔係一部部售賣機擺喺度咁普通。講真，購物、消費，除咗買到件貨外，購買體驗都好重要，如果只係一部部售賣機，搞到成間店舖死氣沉沉又侷促，相信生意都唔會好囉。

發展科技可降成本

講咗咁耐，廣男都係想帶出一樣嘢，到底香港仲要落後到幾時呢？無現金消費幾乎係世界大潮流，香港八達通其實做得唔錯架，但除咗支付系統外，其他消費配套，好似「無人商店」發展咁，似乎就毫無寸進。講真吖，香港人工貴、舖租又貴，如果呢類科技可以發展得更成熟，相信經營成本一定會大大減低，亦會激發香港更多創意，以及投身創新及科技產業，你話係唔係「何樂而不為」呢？

點都好，無現金化已經係大勢所趨，香港要比，一定係同世界睇齊，好似瑞典咁，八十個巴仙交易已經係無現金，當地年輕人仲話，只有婆婆級先會用CASH囉。香港人，大家都要進步喇，你話係唔係先？

原圖：新華網