今年3月舉行嘅立法會補選，提名期噚日已經展開，代表建制派參選港島區嘅新民黨陳家珮噚日已經交咗參選表格，而盲反派果邊就好似話由香港眾志嘅周庭做代表參選，不過上次2016年立法會補選，選舉主任就嚴正執法，DQ咗幾位主張港獨人士參選，今次周庭參選，有評論就指由於周庭所屬嘅「香港眾志」提倡「民主自決」，所以佢都有可能被DQ咁話。計囍雨話齋，我哋未必需要喺而家呢個階段就話要DQ周庭，不過既然坊間有疑慮，佢好應該盡快出嚟澄清立場，以免畀人話佢係「港獨」派。

黃之鋒曾指「港獨」是自決其中一個選項

對於有意參選嘅本土、自決派人士可能面對被DQ嘅風險，今朝電台節目都有討論呢個Hot Topic，今朝公民黨主席梁家傑出席電台節目嘅時候就話，無聽過周庭支持「港獨」，又話只係聽過「香港眾志」秘書長黃之鋒講香港人可以就前途問題公投。至於另一個有出席電台節目嘅資深大律師湯家驊，就話提出「自決」都唔一定違反《基本法》，亦唔等於提倡「港獨」。

今次周庭代表「香港眾志」參選，咁「香港眾志」嘅立場好容易都會畀人以為係周庭嘅立場啦；「香港眾志」喺2016年4月成立果陣，秘書長黃之鋒接受傳媒訪問時就曾經講過「香港眾志嘅」主張係要搞公投，去決定2047年之後嘅前途，佢仲話「香港獨立」係其中一個選項添。好明顯，「香港眾志」呢個立場就算唔係搞「港獨」，都起碼係「暗獨」啦。作為立法會參選人，如果周庭唔講清楚自己立場，真係好難釋除公眾疑慮。

周庭要參選就應該先交代立場

所以呢，喺呢個時候，周庭絕對需要向市民交代清楚佢嘅立場，解釋下佢對於「港獨」、「一國兩制」、「國家統一」等嘅睇法，既然佢要參選，解釋佢嘅政治立場其實都係應有之義，唔可以避而不談嘅。有人曾經話，自決唔等於「港獨」，但囍雨就認為，如果自決嘅其中一個可能結果係「港獨」，咁自決派唔係百分百「港獨」派，都好可能係唔反對「港獨」或者有少少支持「港獨」嘅「暗獨」派。

老實講，如果周庭真係支持「港獨」，只係礙於要參選而避而不談，佢將來就算選到入立法會，佢嘅議員資格都可能會畀人質疑。所以為咗自己，為咗向選民負責，為咗議會唔會有「港獨」聲音，周庭盡快澄清自己立場，先至係「聰明政客」嘅表現嘛！

原圖：周庭Facebook專頁