香港反對派最乞人憎係乜呢？除咗歪曲事實、老屈老作之外，最討厭之處莫過於明明自己犯法，當政府「執正嚟做」提出檢控、警告時，竟然反過來話執法行動係「政治打壓」，好似只要你係反政府組織，就可以凌駕法律咁。近日，由「港獨」味道甚濃嘅組織本土研究社策劃嘅香港民間學院，被教育局警告涉無牌辦學，組織代表陳劍青即時撲出嚟話受到「政治打壓」，傳媒唔理三七二十一，佢講乜佢就報乜，查實大家有冇研究過法例點解咁寫？點解「辦學」都要領牌先？

法例一視同仁 顧及學生安全

一如絕大部份香港法例，香港嘅《教育條例》主要目的都係保障「學生」嘅利益及安全。《教育條例》清楚寫明，「學校」是指一間院校、組織或機構，於任何一日向20人或以上，或於任何時間同時向8人或以上提供幼兒、幼稚園、小學、中學或專上教育或以任何方式提供任何教育課程。機構提供的課程如屬於教育課程，學生人數又達到「學校」定義中所註明的人數，即需註冊或臨時註冊成學校。

唔使識法律，剩係睇字面，相信讀者都會明白，要求「學校」註冊嘅法例，著眼點係喺「人數」上面；即係話如果上堂嘅人數超出限額，咁就需要註冊做學校喇。或者大家唔明，點解人數係咁關鍵，其實講到底都係兩個字「安全」。

「學校」要註冊　因為安全至上

囍雨講嘢，一向有節有理，見到陳劍青出嚟亂吹，即時上網睇吓教育局嘅資料，睇睇註冊做「學校」要咩條件。嗱，複雜嘅就唔講太多喇，大家只要知道，原來申請註冊做「學校」，最重要條件之一，就係拎到屋宇署／房屋署，同埋消防處發出嘅「安全證明書」同「通知書」。

眾所周知，任何場所，人流愈多，危險就愈大。某一個場所如果同一段時間會聚集好多人，視乎場所性質，法例都會有一定規限，好似食肆、戲院、娛樂場所等等，講到尾都係因為人流多、多人聚集，一旦出意外，例如火警，有機會造成好大人命損失。

亂講「政治打壓」 反對陣營勁肉酸

係囉，講到底咪就係「安全」兩個字之嘛，陳劍青之流自己做得唔好，有理冇理就去話人「政治打壓」。而家好簡單請問佢一句，佢個組織搞「民間知識活動」（咪即係「課堂」囉！語言偽術！！）之時，參加人數超唔超過法例規定呀？有冇拎到相關「安全證明書」呀？如果冇，請問邊度嚟所謂「政治打壓」呀？

如冇實證 應收回指控

老老實實，如果本土研究社覺得《教育條例》規定係落後過時，冇問題架，提出嚟畀社會討論囉，睇吓大家覺得係唔係要修改囉，但大家理應明白，喺法例修改到之前，人人都要遵守既定法例，冇人有特權可以凌駕法律。再者，如果陳劍青真係覺得教育局有「選擇性執法」的話，咁麻煩佢舉出例子，有邊一個機構「無牌辦學」，而教育局巡查之後係「故意放生」；嗱，唔好貪口爽、玩老屈呀，要有實證架，如果佢係舉唔出例子嘅，唔該佢就即刻收返所謂「政治打壓」同「選擇性執法」嘅指控。

「本土」喎，理念咁崇高，唔係真係用埋啲下三流手段，學泛民咁老屈老作去撈取政治本錢呀？

圖片來源：香港電台即時新聞