唔畀用金牛既怪現象
唔畀用金牛既怪現象

年近歲晚,假金牛又再湧現香江,搞到人心惶惶,人人自危。原本人見人愛既金牛,一夜之間變得生人勿近,除咗專門賣奢侈品既店舖外,大部份商戶見到金牛都耍手擰頭,聞金牛色變,呢陣恐懼睇怕都會持續一段時間。

早兩晚之嘛,廣男同班老死去打邊爐,五條友仔飲吓食吓,一千蚊鬆好基本啫,點知埋單找數時,老死拎張金牛出嚟,待應見到即時收起笑容話:「先生,我哋唔收金牛喎,乜你冇睇告示咩?」坦白講,人哋只係前線員工,唔通我哋呢班I.T.人會同佢嘈咩,最後梗係死死地氣用信用卡找數啦。

其實除咗酒樓外,唔少大型連鎖快餐店亦講明唔收金牛(小商戶賺蠅頭小利,大家相信亦唔會咁計較),對於呢個現象,我真係覺得好古怪;喂,家陣又唔係所有年份同所有銀行既金牛都有人偽造,一律唔收金牛,有生意都唔做,似乎有啲斬腳趾避沙蟲喎。

我唔係想一面倒批評商戶,鬼叫香港地收到假銀紙既話,損失要自己承擔咩!要求商戶培訓員工專門驗銀紙似乎又行唔通,因為亦會增加營運成本,但唔通真係冇晒計?商戶怕收假金牛會蝕本,咁我地呢啲喺櫃員機攞到金牛既市民好似「得物無所用」咁,其實一樣無奈!

哈,其實外國都有假銀紙啫,唔知外國商戶又係點處理呢個問題既呢?

評論

你可能感興趣