以本土電影作招徠既《那夜凌晨，我坐上了旺角開往大埔的紅VAN》(下稱《紅VAN》)，喺上個禮拜正式上映，作為港產片既超級粉絲，廣男第一時間約埋老友一齊睇，睇下呢套改編自網絡小說既戲有幾好睇、有幾共鳴同幾親切啦！結果，令人非常失望！

首先，唔可以否認《紅VAN》好有親切感。廣男由細到大都喺新界長大、行慣旺角，《紅VAN》入面既場面無論係旺角、獅隧、大埔道、廣福道等場景都耳熟能詳，廣男見到呢啲場景既時候，感覺《紅VAN》好「貼近」自己。可惜，除咗親切既場景、老戲骨如任達華、林雪既演出外，《紅VAN》已經無地方值得廣男讚賞。

《紅VAN》旨在賣弄「金句」

《紅VAN》之所以未上映就「紅」遍香港，佢除因為佢本土味重外，更重要係某壹傳媒不斷吹捧套戲，話套戲充滿影射社會、政府、官員既「金句」，係《紅VAN》既精華所在喎。講真，呢啲「金句」設計得好唔好，見仁見智啦，夾硬用攞嚟批評政府就OK既，但若然套戲只係每隔一段時間放一、兩句「金句」出嚟，而觀眾完全唔明《紅VAN》講乜，又唔知佢成個故事到底想點，更加唔知佢啲情節點「彈」出嚟，有再多「金句」都冇用，咁樣其實對觀眾好唔公平，要觀眾攞一百、幾十蚊入場睇「金句」，咁不如叫大家買本《世界名句大百科》唔係仲抵咩？

至於有人話好有共鳴，或者話無睇過原著唔會明，又或者會話要睇埋《紅VAN》下集先會明。廣男無權Challenge人哋既觀感，但分上、下集既電影廣男都睇過唔少，人哋就算分咗上、下集，故事表達一樣可以好清晰，好既電影就應該將原著既精粹演活喺螢光幕上。如果十個人睇《紅VAN》有九個睇到一頭霧水，仲要話睇唔明既觀眾有問題、唔本土，廣男唯有應承自己「見識淺薄」。

本土包裝，內容欠奉

如果要廣男用八個字形容《紅VAN》電影，呢八個字就係「本土包裝，內容欠奉」，實在要恭喜陳果導演及某壹傳媒成功喺輿論上製造一陣《紅VAN》熱，可惜有成功既包裝唔代表有好既內容，《紅VAN》既短暫成功，唔可以否認係因為佢果層「本土」糖衣。講白啲，《紅VAN》Sell既，就係大眾對社會甚至兩地矛盾既不滿！觀眾入場後發現完全「貨不對辦」，呢種宣傳手法，值得商榷。

引用《紅VAN》「金句」對白 －「大家無謂再呃自己話出面一切係正常，我諗，大家係時候停一停，面對我哋見到嘅現實」，眼前既《紅VAN》只係一個包裝，我哋應該諗下，係咪只要自稱係反映社會、嘲諷政治既嘢，我哋就要義無反顧咁支持呢？這套《紅VAN》，恕廣男沒有共鳴！

原圖：hkbus.wikia