陳果導演將高登連載既科幻作品《那夜凌晨，我坐上了旺角開往大埔的紅VAN》搬上大銀幕，當中情節、對白畀網民係咁轉載、演繹，廣男都畀佢個撲朔迷離既故事吸引住，仲諗住一上畫就同女朋友去睇。不過，見到啲別有用心既人借電影嚟做文章，甚至特登寫篇擺明「老屈」、「抹黑」既文出嚟，廣男覺得呢個已經超出做人應有既底線，簡而言之，嗰條友只不過倡套電影嚟「過橋」，無限上綱上線咁去「抽套電影水」啫。

涉黑為設局害人者 竟反被用來抹黑CY

篇文有乜問題？剩係講到特首選舉果時有黑道幫梁振英拉票、警察又淪為政治打手等，睇完已經覺得好過分，係人都知道，選舉期間嗰場「鄉事選委飯局」係有人擺天仙局啦，倒轉晒黎講，好唔公義啫！篇文講既根本唔係事實，連基本資料都搞錯，又話自己好資深，醜唔醜架？本來又「屈」、又「砌」加埋失實指控既文章，對於呢個作者嚟講就一啲都唔陌生，衰得過有報紙又幫佢登、作者自己個網媒又大力轉載，好似「故事」講一百次就會變事實咁，直頭係人格謀殺喇！咁被人抹黑，唔怪得政府同警察咁「黑仔」喇！

香港地有言論自由、出版自由同行動自由，唔鍾意一個人可唔可以批評佢？梗可以架喎，不過有理據既批評就叫理性有品，相反隨意謾罵就係侮辱、唔係畀你鬧嗰個覺得侮辱呀，係你侮辱自己人格咋。最令人不齒既係咩呀？係篇文裡面將一大堆大家都唔知道真相既嘢，好似商界唔肯繼續喺登佢篇文嗰份報紙落廣告呀、傳媒人受襲等等事件都入晒政府數，為咩？表面上就係話畀人聽香港發生呢啲事大家要小心，實際咪又係要煽動市民唔妥中央同特區政府之嘛。呢啲扮「評論」既「政治抹黑」，睇真啲、諗真啲其實處處「謬論」，真係派膠都費事。

屈警察執法為政治打手 竟然唔臉紅

文章最抽水既地方，係竟然連台灣學生「佔立」、有黑幫人物出現都拉埋一齊講，仲要講到第日有事唔係警察對付示威者，而係黑道喎！嘩，你講乜呀？咁都得？為咗抽水，到底而家啲評論人可以去到幾盡？將警察同黑社會拉埋嚟講，仲要九唔搭八將台灣事拉去香港喎，呢啲咪就係「抹黑」囉！

偏偏唔少人，睇到呢啲天馬行空、擺明「抹黑」既文章都可以LIKE得落手，好心啦，唔該大家唔好好似啲小朋友咁做晒「洗讚小鴨鴨」，係又LIKE唔係又LIKE，傻架咩？學電影《紅VAN》話齋，「社會法律、仁義道德，喺呢度，已經唔重要」，自稱支持民主既衛道之士，原來真係大晒架，做乜講乜都係「正義」喎，屈你哋兩句就小事啦，你唔就範連大家有份既中環都可以佔領添呀！

引用前《曼徹斯特衞報》主編斯科特一句說話，「Comment is free, but facts are sacred」，意見當然係自由表達，事實係神聖既，如果意見唔尊重神聖既事實，莫講話對社會無益，對自己公信力亦無好處。況且用謊言誣陷堆砌出來的民主，而係好似埃及咁，有民主制度、沒民主素養，結果係得個「亂」字！

原圖：hkbus.wikia