大家唔係好明條題講乜？查實囍雨講緊既係違法佔領發起人陳健民，呢位學者、副教授，喺違法佔領發動一周年既日子，再次高調接受傳媒訪問，話自己唔認同「以武制暴」，又話自己違法佔領後期，同年輕人路線有分歧，結果因為佔領鬆散，令到推動政制改革失敗收場喎。

陳健民讀咁多書果然唔野小，初初聽到佢咁講，一向強烈反對違法佔領既囍雨都差啲畀佢呃到。陳健民今日同人講，話自己反對「以武制暴」，睇落去就大仁大義，但大家諗深一層，當初係邊個將「違法抗命」既不良意識帶入香港，令到香港無啦啦畀人佔領咗79日架？咪佢、戴耀廷同朱耀明幾個佔領發起人囉！

由2013年1月起，嗰啲乜嘢「公民抗命」、「違法達義」、「犯法不犯罪」同「生於亂世有種責任（去犯法）」等等既歪理就充斥住香港整個輿論空間，部份市民個腦畀人日洗夜洗，最終信咗陳健民、戴耀廷佢哋嗰套，走去參加違法佔領。

最恐怖係，呢股違法意識並冇隨住違法佔領結束已消散喎，之後既「鳩嗚」呢？「暴力光復」呢？「旺角反大媽」呢？乜呢啲唔係佔領餘波咩？正正因為陳健民提倡既「以違法手段表達訴求」呢種危險意識，經兩年反覆傳播，已經深植部份人腦海，先至會發展成今日香港部份人以為，表達訴求就乜手段都可以用，就算犯法都唔緊要！

陳健民家陣雖然同「以武制暴」切割，戴耀廷又話當初唔應該佔領咁耐，令運動失去民心，但對唔住囉，你哋由佔領開始果刻已經失民心啦！仲有，唔係你話自己冇鼓吹暴力就係冇，情況就好似鎅傷人之後，對方受到細菌感染，唔通你話傷者既感染同你無關，你其實好反對細菌去感染人咁呀？咁合唔合理先？咪玩啦！

講到底，違法佔領三個倡議人，最大問題就係打開咗潘朵拉的盒子，令到違法抗命意識喺社會散播。大家唔好唔好記，三個倡議人喺佔領中期已經靜雞雞咁退出，點解呀？咪就係因為佢哋知道自己已經控制唔到場面，法就犯咗喇，但唔可以阻止參加者用暴力囉。

各位市民，希望大家認清呢三個人既真面目，佢三個一日唔承認「違法抗命」既理念有錯，大家都唔好相信或者同情佢哋。三個發起人都係高級知識份子，唔係三歲細路，成年人為自己做錯既事認錯，深切反省，承諾以後唔會再犯，好合情合理吖！

原圖：rthk