港澳辦副主任馮巍日前嚟到香港同民主黨見面，生果報今日就喺頭版放咗隻「新聞」，搵兩個唔具名既所謂泛民人士分析，話「有人猜測中央是否不滿港府、中聯辦溝通表現，才安排港澳辦官員直接見民主黨」喎。睇到呢類「報道」，真係唔知好嬲定好笑，先唔講「分析」唔具名，可信程度已經大打折扣，乜同中央官員「直接」會面唔係泛民一直既要求嚟架咩？而家可以直接見京官，你又話中央唔滿意港府溝通表現，個龍門搬到北極咁遠，咁好難觸摸架喎！

好啦，等囍雨分三個層面，「分析」下呢篇所謂「報道」有咩謬誤啦。

首先，今次民主黨同馮副主任會面，係由基本法委員會副主任梁愛詩安排同牽線既，呢啲係已知事實；另一個已知事實係，詩姐作為中央特使，代表中央同泛民溝通接觸聯絡已經唔係第一次。大家仲記得2010年政改嘛？當年為咗政改，詩姐四出奔波，終於促成政改通過，作為傳媒，就算唔記得，都可以做吓RESEARCH先寫啩？

既然詩姐做中間人已經唔係第一次，咁由佢負責牽線，安排泛民同京官會面有幾出奇、有幾特別呀？

第二，查實泛民不嬲都有單獨同中央官員會面既要求，冇幾耐之前之嘛，即係社會討論緊政改既時候呢，泛民一方已經不斷話要見中央官員啦，好，而家中央官員不計較繁文縟節，滿足泛民訴求，你份生果報又上綱上線話中央唔信特區政府，咁真係你講晒啦！

最後要講既係，其實連民主黨亦承認，特區政府事前已經知道有會面呢件事，只不過係冇派員出席啫；而港澳辦亦發表聲明，點出「中央政府官員與香港社會各界、各政團以不同的方式會面、聽取意見，是正常的安排」。

唔見，又鬧特區政府阻住晒；見，又鬧特區政府信唔過，奉勸呢份報紙既資深員工，與其花咁多時間登埋啲疑似「新聞」炒作話題，不如認認真真做好份報紙既內容，唔使搞到日日跌紙咁慘啦！

原圖：bastillepost.com