//林大輝中學基金宣布向張家朗發放至少250萬元獎金，唔該嗰班話「張家朗奪金，留名者有港幣2000元」嘅網民，學下咩叫找數喇~//

呢兩日最開心嘅新聞係咩？梗係花劍王子張家朗勇奪香港回歸後嘅第一枚奧運金牌喇，而呢個亦都係香港歷史上嘅第二枚金牌，身為香港市民都普天同慶，以佢為榮。喺尋日張家朗決賽之前，大家一齊集氣，期待佢取得好成績。但偏偏有一班人喺度唱衰放負評，仲立字為憑打賭張家朗輸硬喎。

原來張家朗出身運動世家，爸爸張子倫曾經係香港甲一籃球成員，當年香港甲一籃球聯賽仲代表警察隊奪得聯賽冠軍𠻹。唔知係咪因為咁，一班偏激網民就搞對立搞上腦，比賽前留言係咁唱淡，話咩咩咩「如果張家朗贏到金牌，維園直播吞劍」、「留名者有港幣2000元」、「自隊一箱可樂加萬樂珠」等等嗶哩吧啦，簡直係影衰香港人。結果張家朗成功奪金，粉碎呢班立心不良網民嘅癡心妄想。好心提醒佢哋，之前白紙黑字講到實牙實齒，係咪要快啲找數啊？

嗱，林大輝就為呢班網民做咗一個好好嘅示範。張家朗曾經就讀嘅林大輝中學，現任體育學院主席林大輝曾經許下諾言，「如果獲得奧運獎牌，包運動員做業主」。張家朗尋日奪金之後，林大輝中學基金就宣布向張家朗發放至少250萬元獎金，加上精英運動員嘉許計劃嘅500萬元獎金，總共有750萬元獎金。嗱嗱嗱，留言打賭嘅網民，學習吓咩叫找數兌現承諾喇。如果真係要自打嘴巴走數，都記得出來為你哋嘅偏激言論認衰兼道歉喎。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk