//曾經好風光嘅公民黨，結局睇怕只剩一個，只可以話「出嚟行預咗要還」，自己攞嚟~//
由一班資深大律師包括余若薇、梁家傑等創立嘅公民黨，曾經風光一時，有5位立法會議員同32名區議員，但隨著楊岳橋、譚文豪、郭家麒、郭榮鏗被DQ和陳淑莊參與泛民總辭，各人並已先後退黨、立法會議席「清零」，至於區議員退黨跳船消息更加停不了，最新消息係又有11名公民黨區議員宣布退黨，即係話依家公民黨只剩下5個區議員，睇嚟滅黨只係遲早嘅問題。
政府將喺7月安排區議員宣誓，據報參與泛民初選、借出議員辦事處做初選票站、簽署「墨落無悔」抗爭派立場聲明書嘅區議員，都會被納入「負面清單」。公民黨最新退黨嘅11名區議員當中，離島區議員容詠嫦急急跳出來同公民黨切割。話咩咩咩「公民黨簽署聲明嘅時候，未有諮詢過佢，因此佢唔同意有關做法」，仲強調自己從未借出議辦作初選票站喎。哇哇哇，所謂「墨落無悔」嘅聲明書，發生喺舊年年中，容詠嫦如果唔同意聲明書內容，點解唔一早表明立場？要到退黨一刻先劃清界線？針拮到肉先知痛，係咪太遲喇。
前有黨友寫信要求解散公民黨，後有區議員紛紛跳船保平安，公民黨呢條破船風雨飄搖，但主席梁家傑係都死撐到底。公民黨發聲明話，「現存黨員（包括5名區議員），深信公民黨即使經歷幾波退黨潮，議員數目銳減，但依然有工作空間」，仲強調「餘下5個區議員會繼續堅守陣地」喎。不過公民黨如果唔搞風搞雨，破壞香港，好好地為市民做事，使咩搞到今日咁淒慘嘅？只可以話，出嚟行預咗要還，自己咎由自取囉。
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論