//事實係點，記協嘅所作所為，大家看在眼裏，心中有數喇。 //

咩叫「歪理當真理」，睇吓記協就知啦。日前警務處處長鄧炳強不點名批評有媒體「生安白造」新聞，矛頭直指生果報錯報奧斯卡得獎男配角感言，又老屈《港人講地》散播不實消息，仲引述記協主席楊健興話「呢啲唔係假新聞，只係報道嘅角度唔同啫」。記協似乎好唔忿氣，隨即發聲明反擊話一哥「混淆視聽」，仲死撐涉事媒體事後已主動更正同道歉，「釐清資訊，反映行業有良好的自律習慣」喎

嘩嘩嘩，依家生果報係將冇發生嘅嘢講成發生咗，冇Factcheck就亂咁報出街，一句道歉就當冇事？佢哋喺暴亂期間散播「831打死人」、「新屋嶺性侵示威者」呢啲又係唔係假新聞啊？記協作為記者工會，口講要維護新聞自由同新聞操守，仲話要提升會員嘅專業水準喎，原來得個講㗎咋？生果報屢次犯錯，最低限度記協係咪都應該有跟進行動，避免類似事件再發生先，唔係一句「唔評論」玩包庇就得囉！

嗱嗱嗱，其實記協包庇又何止第一次？走佬前議員許智峯舊年將《大公報》記者當「國安」，涉禁錮記者成4個鐘，記協事後非但無譴責許智峯，反而建議《大公報》開記者會交代清楚喎！反修例期間，不足13歲男童喺示威最前線聲稱做「記者」，主席楊健興就話有權採訪 ；有記者係直播期間性騷擾女警員，記協拖咗幾日先至話遺憾，呢啲就係記協所謂「維護新聞專業」喎，究竟邊個先係混淆視聽，你明的！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk