唔知點解，近年泛民主派發起既遊行，硬係會同警方有好多爭執，一時又話警方拒絕開放更多路線，一時又聲稱警方既拘捕手法粗暴，仲要鬧警察係「香港公安」、「警犬」。就咁聽，真係會以為香港警方勁多問題架。
 
所謂無比較，就只會剩係睇到事情的一面，而睇唔到另一面。殺出一個「保普選 反佔中」大聯盟，係今個星期日舉行「和平普選大遊行」，一對比之下，點解人哋可以理性咁多既？為咗避免遮打花園塞到爆，大聯盟將終點改到匯豐總行，行完即散，又應警方要求，喺維園派發另一種木棉花同大會貼紙。遊行表達意見之餘，又顧及其他市民、道路使用者既權利，肯溝通、肯妥協，絕對值得表揚！
 
當然，你可以話未發生，點知係咪咁文明呀？但起碼態度正面。講真，警方都係為市民服務啫，所講既「市民」唔止遊行人士架，仲包括唔遊行的市民，點會好似泛民咁，只講遊行人士權利而唔講其他人既權利，勁唔公道呀！
 
睇唔過眼既，仲有戴耀廷居然話自己攪既「佔中」電子公投果啲係「高質量民意」，似乎暗示反「佔中」簽名「低質素」；戴教授，表達意見唔係人人平等既咩？唔知係咪呢啲民主霸權，實在令到沉默既大多數唔再忍啦，要出來發聲。總之，百多萬人選擇用和平方式表達保普選的意願係鐵一般既事實，邊個質素高，邊個質素低，香港市民，你懂的！