【笑聞一分鐘】救生員罷工為改善待遇 「炒作」兩地矛盾好卑鄙?

救生員工會近日搞罷工,要求康文署改善待遇加人手。一樁勞資關係新聞,某壹傳媒竟然加鹽加醋,硬要加「強國人迫爆泳池」之類既題,等讀者將件事同兩地矛盾劃上等號,認真卑鄙。理據呢?數據呢?冇架,百分百感覺咋。
 
嗱,睇返救生員工會有咩訴求先。港九拯溺員工會副主席郭紹傑話,罷工就係要康文署正視人手不足問題,同時要加人工吸引新人入行。佢仲話,救生員薪酬不升反跌,而家比救護員少四千喎。
 
咦咦,乜人手流失唔係同內地泳客有關咩?Sorry,工會冇講過囉!
 
某壹傳媒將件事扯上兩地矛盾,純粹因為早排有內地傳媒推介,話香港泳池衛生又夠平,值得一去。報道出街,某個打住「本土」旗號既政黨即刻抽水,話收到街坊投訴泳池多咗講普通話既人,「質疑」係畀內地客迫爆。不過最好笑係,個黨除咗承認冇統計同數據外,竟然仲話「香港唔少人都講普通話,所以都未必分辨到」喎。
 
嘩,無真憑實據都入哂個人遊數?睇唔過眼既人就喺報章專欄批評,「無數字就話內地遊客迫爆泳池,仲要取消一簽多行,聽起上來好牽強喎!」
 
講真,夏天香港泳池迫爆係事實,亦係問題,但到底係泳池唔夠,定係太多內地人客「游平水」,大家都好想知,政府好應該快啲搞清楚,對症下藥。
 
至於睇新聞的市民,就要自己識得分析,方為上策。

評論