多間傳媒報道，多次接辦反對修訂《逃犯條例》案件、協助多名被告的韋智達律師行（Vidler & Co. Solicitors），早前向香港律師會提交擬停止執業通知書，計劃今年6月3日停業。有傳媒就報道，韋智達昨晚9時許拎住大量行李現身香港國際機場，漏夜離開香港，據報同行仲有一個華裔女性添，搞晒登機手續後，隨即就同該名女子道別，入閘離境。由於韋智達一直冇交代執包袱走人嘅理由，故此外界都無從得知佢夤夜出走的原因，不過，同佢有交情的另一名「人權律師」就向傳媒講出其實一個可能的理由，原來竟然係同早前政府提出嘅法援改革有關？

法援改革收效？

韋智達間律師行點解要執笠，外界無從證實，不過某份立場愈來愈激進的主流報章，日前就訪問咗另一位所謂嘅「人權律師」帝理邁（Mark Daly），帝理邁本身係現任香港律師會理事，相信佢的分析都有一定份量啦。佢話喎，韋智達間律師行執笠，當中或涉好多因素，除法援制度改革之外，新冠疫情打擊營商環境，亦會影響律師樓收入。

有關報章亦引述一名不願具名嘅「人權律師」所講，指政府修改法援制度後，過往擅長處理性小眾、少數族裔等人權官司嘅律師樓幾乎無案可接，改由欠缺經驗的律師樓接案云云。

法援改革阻壟斷

咦！如果帝理邁同嗰一位「不願具名」嘅「人權律師」所言屬實，咁咪即係證明咗特區政府舊年提出嘅法律援助改革方案係成功，的確可以收到公平分配法援官司嘅效果囉？嗱，囍雨唔係吹水，政務司司長辦公室同法律援助署，舊年十月向立法會提交文件，交代「完善香港法律援助制度的建議措施」，當中包括喺刑事案件方面，規定由法援署署長指派律師畀法援申請人，禁止「自選律師」，除非有關律師之前曾經喺下級法院代表事主等等。

另外，上述建議亦調低接辦民事法援案件數目上限，大律師減到每年最多15宗（原本係20宗），而律師最多30宗（原本係35宗），並且就接辦司法覆核法援案件設立新限額，大律師每年最多三宗，律師最多五宗。

大膽改革 撥亂反正

事實擺在眼前啦，多個傳媒其實亦有報道，韋智達以往接辦大量社運、反修例暴動、社會事件、性小眾等等人士嘅官司，有理由相信當中唔少都係藉住申請法援而聘用韋智達，結果當法援改革一推出，真係成功扭轉到法援案件被部分律師壟斷嘅現象，令到公帑更加用得其所，事實再一次證明，政府舊年推出的改革真係有用，呢點真係值得一讚。

點都好啦，法援嘅資源，其實即係民脂民膏，運用起上嚟嘅時候，一定要顧及「公平」同「透明」兩大原則，如果以往真係出現法援公共資源集中喺某部分律師手上的話，咁呢個制度好明顯就有問題啦。政府成功撥亂反正，得益最大嘅其實係香港市民，希望未來政府持續檢討現行施政範疇裡面有咩係需要改革嘅，識別到之後盡快提出完善建議，千萬唔好再猶豫，咁先係香港之福呀！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk