起底刑事化 有何問題?
起底刑事化 有何問題?

自反修例運動以來,暴力、謊言同起底,係反政府分子嘅「三大武器」,講暴力,絕大部分暴力分子已經俾警方拘捕;講謊言,少咗《生果報》,反對派傳播謊言嘅力量已經大減;至於起底,直至近期廣男仍然見到有從政者俾人起底,所以問題在於,當反修例暴亂開始平息,但仍然有人將起底行為「武器化」,政府將有關惡行「刑事化」,到底有何問題呢?


美企威脅撤出香港?


話說,特區政府打算修訂《個人資料(私隱)條例》以打擊相關行為,任何人違反「起底」罪行,最高可被判罰款100萬元同監禁五年;有美媒報道,稱互聯網業界對有關法例深感憂慮,恐怕駐港員工會受牽連,美國科企包括Google、Facebook以及Twitter更私下警告港府,如果繼續推動立法,佢哋或會撤出香港市場。最新消息指,有業界組織及科技巨企澄清,從無計劃撤離香港。


對於互聯網業界以至部分美國科企嘅反應,廣男認為,各界要明白一樣嘢,起底「武器化」,係咩一回事。喺反修例運動期間直至最近,所謂「起底」,唔係一般上網「談論」下某人例如警察、官員、從政者等,而係將佢哋個人資料包括地址、電話、身份證號碼甚至家人資料擺上網(個人資料私隱專員公署自2019年6月至2021年4月間,接獲以及主動發現超過5,700宗「起底」投訴個案);繼而會出現咩事?就係被起底者同家人會被騷擾,電話滋擾、恐嚇,甚至連相關人士嘅年幼子女都會受到滋擾。喺呢個情況底下,如果特區政府唔處理,起底「武器化」,就會繼續成為極端分子其中一個攻擊政見不同者嘅「工具」。


業界、美企過慮


由此觀之,特區政府推動立法,好明顯唔係要針對一般市民或網民,而係有心利用現有法律漏洞去起底、「攻擊」他人嘅壞分子;甚至可以話,政府咁做,會令到整個互聯網嘅生態更健康,不法之徒亦再無空間借他人個人資料作出攻擊、滋擾,就要承擔罪責。如果廣男係互聯網業界或者科企管理層,一定會支持立法,甚至推動加快立法。


誠如香港個人資料私隱專員公署發言人所指,需要修例以處理「起底」問題,形容「起底」行為已經挑戰道德和法律底線。廣男喺度諗,如果被起底嘅係互聯網業界人士,或者係科巨嘅相關負責人,廣男肯定,相關人士就會明白被起底、被滋擾甚至被恐嚇係何等痛苦,唔會再質疑港府立法工作。 


圖片來源:立法會網頁


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

23
好正
6
心心眼
2
好好笑
0
令人傷心
0
嬲爆

評論

  • 你的光榮,我的榮耀
    你的光榮,我的榮耀
    2月前
    0 回應
    立法要嚴
    • +85298****49
      +85298****49
      2月前
      0 回應
      Excellent
      • 龙一吟
        龙一吟
        2月前
        1 回應
        更支持廣泛設立 CCTV 保障市民安全大於正常私隱權。

        沒有更多評論

        沒有更多評論