點解青年上唔到車?
點解青年上唔到車?

最近,囍雨同一位老友傾偈,呢位「未上車」嘅朋友,不斷同囍雨傾關於買樓嘅事,囍雨相信佢嘅處境,幾反映到時下年輕人嘅無奈,明明人工唔算低,但係一路儲「首期」,儲嚟儲去都追唔上樓價升幅;同樣慘嘅問題係,依家啲樓咁貴,就算佢搞掂「首期」但過唔到壓力測試(未有伴侶同佢一齊承擔),買樓隨時變成「賠大訂」。睇到呢啲活生生嘅例子,囍雨感到非常慨嘆,依家啲年輕人想有層樓安居啫,點解都咁難?

 

梁振英建議「有得諗」

 

近日有留意關於房屋政策嘅問題,應該會留意到全國政協副主席、前特首梁振英提出咗一個建議,就係開發大欖郊野公園嘅邊陲土地,興建居屋單位約兩至三萬個,劃一以每平方呎6000元嘅定價,賣俾無物業嘅香港永久居民。做個簡單換算,即係一層500平方呎嘅居屋,售價只係300萬元,如果做九成按揭、供25年,每月嘅供款大約12,000元,平過大家依家租樓住。

 

聽到朋友嘅「未上車」故事,然後又見到梁振英嘅倡議,囍雨更加認為梁振英嘅建議合乎現實。首先,如果實行梁振英嘅倡議,一班未有足夠「首期」嘅年輕人,只要抽中呢個以嶄新形式出售嘅居屋單位,唔需要再為首期煩惱。第二,則係買居屋應該有政府做擔保,加上樓價比一般私樓「平成倍」,所以壓力測試都唔會大問題。大家仲可以諗多一步,就係計劃如果成功並且推而廣之,開拓到更多土地並且用呢套方法售賣居屋,可以喺短時間內供應一定數量嘅房屋,房屋短缺或價錢太貴嘅問題,自然亦有望解決。

 

認清事實 對焦討論

 

對於一個房屋政策倡議,喺一個「正常」嘅社會,大家都應該會熱烈討論相關議題,偏偏喺「政治先行」嘅香港,唔知點解有啲人或媒體就完全將焦點扭轉,例如話梁振英在任時唔提出計劃,又或者質疑梁振英有「政治目的」云云。其實,梁振英喺任內一份《施政報告》,已經提出利用郊園公園生態價值唔高、位於邊陲地帶土地用作興建公營房屋,並於2017年邀請房協做生態及技術研究;可惜,相關研究之後被終止,時任房協行政總裁黃傑龍曾表示過,對研究提早結束感到可惜,希望社會再探討。關於呢個事實,社會大眾應該要知,因為梁振英早就提出計劃,只可惜研究後來被終止。

 

外界亦有聲音指應重新由房協研究,以科學理據嚟處理郊野邊陲地嘅可行性。關於房屋問題,大家唔好政治化,應該聚焦討論點樣增加房屋供應,否則,好似輪候公屋人士咁,等「三年之後又三年」,叫市民點等,又點忍? 


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

19
好正
12
心心眼
4
好好笑
2
令人傷心
3
嬲爆

評論

  • wai wong
    wai wong
    5月前
    0 回應
    而家講到咁好,都唔知幾時先可以推出計劃
    • Happy21
      Happy21
      5月前
      0 回應
      :blush:
      • Happy21
        Happy21
        5月前
        0 回應
        :+1:

        沒有更多評論

        沒有更多評論