問問大家，有冇睇過《生果報》日前高調宣傳嘅果封黎智英親筆「家書」？講到明係《生果報》、係黎智英，佢哋想表達咩立場，相信大家估都估到。囍雨睇過呢封「家書」之後突發奇想，如果大家寫封回信俾黎智英，你會最想同佢講啲乜？囍雨諗到最想講嘅一句係，請黎智英以至《生果報》唔好再用所謂嘅「獄中來信」洗香港人腦！信奉果套歪理荼毒的後果，依家黎智英咪就係「最佳人辦」？！

「言論自由危險」？

當黎智英封信講到「現在言論自由是危險工作」，又叫啲同事要「份外小心、不要犯險」時，囍雨首先想反問句，一直以嚟香港嘅言論自由究竟有咩問題先？大家依然可以發表唔同意見，甚至批評政府不足嘅聲音幾乎日日都有，但如果話，「言論自由」等於去銀行可以喊「打劫」、上飛機可以嗌「劫機」，咁呢種「自由」絕對有涉嫌違法嘅「危險」。同樣道理，港人平日行使言論自由，從來唔係問題，但如果有人打住「言論自由」嘅旗號去危害、或者煽動其他人去危害國家安全、破壞法治，就極有可能要承擔法律責任。如果呢種係黎智英所謂嘅言論自由，咁對唔住，香港人唔需要，任何法治社會亦都唔會接受。

再者，囍雨唔理解，喺香港正規從事新聞工作，何來「犯險」？當然，如果有啲媒體係通過「做新聞」或者「造新聞」，去煽動「抗爭」、美化暴力，甚至成為呼籲外國制裁香港、國家嘅文宣平台，就另當別論；又或者，有傳媒機構老闆實質儼如政客，根本就係充當外國勢力喺香港嘅「代理人」，「致力於」反中亂港，囍雨又想問問黎智英，喺佢推崇嘅英美等西方國家，又有冇咁樣嘅「新聞自由」？

煽惑年輕人也叫「正義」？

所以，當黎智英、《生果報》吹噓自己「高舉正義」時，囍雨想講，請唔好玷污「正義」呢兩個字！反修例運動以嚟，一批又一批青年、學生受佢哋煽惑，成為「違法達義」等歪理邪說嘅犧牲品；打砸搶燒、殺人放火呢啲惡行，成為《生果報》筆下嘅「英雄故事」，結果呢？就係如今要面臨牢獄之災或者法律制裁嘅後生仔女數以千計，請問，呢啲叫「正義」？黎智英話，自己喺獄中「一切安心平靜…吃得不錯睡得好」，囍雨想講，諗下果班被煽惑嘅年輕人同埋佢哋嘅家庭，黎智英真係仲可以「食得落、睡得好」、心安理得？如果係咁，囍雨只可以講句，呢種人無藥可救！

不過黎智英信中有一句「只要我們不被不正義的誘惑蒙閉，不讓邪惡透過我們而得逞」，囍雨覺得講得啱，呢樣嘢，正正係大家要正視嘅問題——唔好再俾黎智英、《生果報》所誘惑蒙閉，唔好再讓邪惡透過佢哋而得逞。最後囍雨想同黎智英講，今時今日，唔係香港令人「心寒」，而係有人不惜打爛香港家園、破壞法治秩序，甚至欲分離、顛覆自己國家，才真正令人心寒！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk