越來越相信，好多時候，一件事、甚至幾句話，就足以睇穿一個人；如果一個人，能「用今天的我打倒昨天的我」，你大概就知道，呢種人嘅誠信多極有限，唔係事實先行，而係立場先行。
講緊嘅，係身處台灣嘅銅鑼灣書店負責人林榮基。如果廣男冇記錯，林榮基喺2016曾經對外媒講過，自己相信「香港法例對香港人有保障」，仲自稱「習慣在法治下生活，相信法律」；依家，佢就攻訐「香港法庭大家也知道，它不是獨立的」、「都是要根據政府的意思來判刑，只是要跑一個程序」…大家認為，林榮基係咪侮辱緊香港法庭、香港法治呢？
認罪與否 判刑已定？
日前，香港反對派幾個主要人物，包括《壹傳媒》創辦人黎智英、支聯會主席李卓人以及民主黨前主席楊森，因參與前年8.31未經批准集結，喺法庭上選擇認罪。坦白講，廣男認為事件本身並唔複雜：依法檢控 — 依法審理 — 被告認罪。然而尤是如此，林榮基除咗發表上述攻訐香港法庭嘅言論之外，仲宣稱不管黎智英等認罪與否，「最後判刑都已經定下來」，咁不如請林榮基話俾大家知，佢呢番講法有咩事實根據呢？一宗連被告自己都認罪嘅案件，都可以如此抹黑、攻訐，廣男有啲好奇，如果今次企喺被告欄中嘅唔係林榮基嘅「同路人」，佢仲會唔會有嘢講？話林榮基唔係政治立場先行，你信唔信？
犯法就是犯法！
講開今次案件，因為涉及黎智英等反對派頭面人物，自然又成為台灣政客趁機大抽政治水嘅好題材。陸委會嘅副主委邱垂正噚日就喺記者會上指摘，香港「對和平表達訴求予以定罪」，又稱「爭取民主自由無罪」，並要求香港應該「立即釋放香港良心犯」云云。或者大家應該反問一句，「自由民主」如台灣，可否允許有人「和平地」犯法？又可接受以違法嘅方式「爭取民主」？請台灣政客搞清楚，犯法就係犯法；一眾被告，絕不是所謂「良心犯」！
所以廣男成日都話，如今香港最大嘅問題之一，唔係民主與否、法治與否，而係一直有人打住民主嘅旗號破壞法治，如今對於呢啲違法或者涉嫌違法嘅人依法追究，先至係香港法治、司法獨立本來就應該有嘅樣子。更何況，呢啲係香港自己事務，好心台灣當局抽少陣「政治水」啦！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論