如果一個人唔想承擔罪責，最好嘅預防方法係啲咩呢？答案就係唔好以身試法。據傳媒報道，身負三宗案件在身嘅前立法會議員區諾軒，喺自己搵人撰寫求情信時「處處碰壁」、「有苦自己知」，官司纏身以致心力交瘁，又稱法庭維護唔到權利云云。廣男覺得，有啲道理真係講一百次都唔會少，如果有人涉嫌違法或者確實違法，咁點可以怪依法審理案件嘅法庭，或者怪責政府以至執法者呢？

區諾軒的「低聲控訴」

睇返區諾軒嘅說法，大家或會感受到佢作為反對派政客嘅「無力感」，例如提到官司，佢就話「不斷面對官司，法庭維護不了權利，我還有什麽力氣在庭上說話？」；提到政治環境，佢就話「我已經不敢再寫文章，因為在目前的環境，多說一句便多一分危險」；提到警方執法，佢就話「無理由將民主派趕盡殺絕」、「社會應有多元聲音，保留愈多民主派，社會才有前進的可能」等等，講咗咁多嘢，廣男嘅感覺係，區諾軒似乎無乜罪疚感，而似係想將責任歸咎於政府以至執法部門。

老實講，區諾軒因為襲警案或者搞初選被捕甚至被檢控都好，呢啲嘢唔係其他人「逼」佢做，而係佢作為一個政客嘅個人選擇；作出決定、做出某啲行為，然後就對外宣稱「法庭維護不了權利」，咁對法庭極道不公。同理，當佢講到「多說一句」都有危險嘅時候，廣男又要先問一句，你想講咩先？因為說話而招致刑責嘅民事、刑事罪行比比皆是，唔該唔好講到被逼害咁款啦！

認清《港區國安法》

至於超過50個反對派被捕嘅問題，區諾軒稱國家在港設立新底線，但「無理由將民主派趕盡殺絕」，廣男認為當中有啲概念，大家一定要搞清楚，如果有人要批評政府施政，例如某啲民生政策做得唔夠到位，絕對無問題；但如果係想搞「攬炒」，例如透過初選癱瘓政府，甚至最終促使外國制裁中國等，咁就好明顯唔係中央或港府要對反對派趕盡殺絕，而係反對派想奪權「變天」。

其實，區諾軒嘅經歷，正正係話俾其他反對派政客以至支持者聽，犯法就要承擔罪責，任何人都唔會因為政客身份而免責，事後先嚟「後悔」及「怨天怨地」，絕對係無濟於事。搞到今日嘅局面，區諾軒自己要負上最大責任，問題唔係佢如何被執法部門、法庭對待，而係佢做過乜嘢，而令到自己將要承擔種種責任，要怪，只可怪自己。

原圖：區諾軒facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk