如見學生違法 校方不能不阻
如見學生違法 校方不能不阻

「不知地厚天高」呢句話,絕對可以用嚟形容依家嘅大學生,喺部分大學生眼中,反政府、搞抗爭係生活嘅「一部分」,就如中文大學學生會嘅候選內閣,日前接受訪問擺出一副「預咗俾人拉」嘅姿態;而另一間本港著名學府香港大學,近日亦有學生會打算舉辦紀念「旺角暴動」嘅活動,仲打算播放「港獨」派梁天琦嘅紀綠片《地厚天高》;其實大學已經出面想阻止事件,但學生代表似乎不為所動,仲發聲明表示「莘莘學子,矢志不移。本會將如期舉辦《地厚天高》放映會,期望同學出席,毋忘香港本土歷史中的每點涙、每滴血」,咁樣踩界,如果因而被捕甚至被檢控,到底為咗咩呢?

 

這不是一般「影片」

 

講開《地厚天高》,即係關於「港獨」派梁天琦(至少當時係「港獨」派或倡議「港獨」嘅本土派人物)嘅紀錄片,囍雨必先要講,當中嘅一啲內容,包括有「港獨」「光時」口號嘅內容,梁天琦稱「以武制暴是唯一出路」以至影片展示「香港獨立」字眼旗幟等等,套用喺今日《港區國安法》已經生效嘅情況下,港大學生會要公開播呢條片,會唔會觸犯《國安法》真係好難講,佢哋堅持要播呢條片,真係有「以身試法」嘅感覺。

 

所謂《年初一紀事》攝影展、播放《地厚天高》紀錄片,大家或者會問,港大學生會代表搞一間「紀念」「港獨派」搞暴動嘅活動,又播其代表人物嘅紀錄片,實則意欲何為呢?囍雨就覺得,學生代表們必先要搞清楚問題,如果佢哋係要「紀念」、「再紀錄」一件違法事情,本身已經唔可取;而如果當中有訊息係散播「港獨」思想,佢哋嘅活動可能再唔係「紀事」同做政治宣示,而係挑戰「國安法」,當中所涉罪責極重,恕囍雨坦白講句,後果未必係呢一班學生代表承擔得起。

 

學生不要以身試法

 

不論係打算播放「港獨」人物影片嘅港大學生會,或者「有被捕準備」嘅中大學生會候選人員,囍雨都想同佢哋講句,做學生會、想做學生代表,絕對無必要作出可能違法嘅政治表態,或者去搞一啲擺明「踩界」嘅活動;入大學,唔係為咗要做咩政治行動,而係應該踏踏實實讀書,再進一步就係為其他學生服務。

 

自去年6月30日《國安法》實施以來,已經有97人涉案被捕,當中被已被檢控嘅有八個人;囍雨想問下,港大學生會係咪想令涉違《國安法》嘅被捕人數突破百人?大學方面欲勸阻活動,係怕你哋「玩火」繼而要承擔風險,唔係要「踐踏學生自由」!懸崖勒馬,回頭是岸呀! 


圖片來源:RTHK、港大學生會Facebook


請Follow我們的YouTube頻道:https://bit.ly/2kgU8qg


下載我們的手機應用程式,收看第一手精彩內容:https://www.speakout.hk/app


瀏覽我們的IG:https://www.instagram.com/speakout_hk/?hl=zh-hk

27
好正
8
心心眼
4
好好笑
3
令人傷心
12
嬲爆

評論

  • 龙的傳人
    龙的傳人
    7月前
    0 回應
    港獨始祖梁天琦,禍港害國,為什么不拉他??
    • +85252****88
      +85252****88
      7月前
      0 回應
      :monkey_face:
      • +85295****77
        +85295****77
        7月前
        0 回應
        :monkey_face:

        沒有更多評論

        沒有更多評論