「我會用我自己嘅身位 - 超區坦克車，將呢啲阻住我哋議事嘅立法會親中保皇議員，一個一個車出議事堂」，喺一個Facebook宣傳帖上，要競逐俗稱「超級區議會」立法會議席嘅元朗區議員王百羽，講出以上嘅「豪情壯語」，可惜可惜，王百羽出師未捷，已經同佢拍檔、另一區議員李軒朗被捕。據報，佢哋申報選舉開支時，竟然獲一間公司捐出450萬元嘅選舉服務，令警方懷疑佢哋串謀製作虛假文書、藉此虛報選舉開支以欺騙政府的選舉資助；廣男好奇，原來一場選舉（後因疫情取消），可能係攬炒派政客借機「掠水」嘅騙局？
450萬元的「服務」？
老實講，當王百羽、李軒朗申報自己選舉時接受咗一間公司450萬元服務嘅時候，好多人都覺得驚奇，到底該公司提供咩服務，可以搞下形象又幾十萬元，寫份稿又25萬元，當時就有人去舉報王、李，有人甚至開記者會，形容有關服務係「天價」，有欺騙津貼之嫌。果然，警方終於出手，將王、李以及相關公司嘅前董事拘捕。
廣男覺得，呢單案至少有兩個重點，警方一定要追查落去，首先當然係所謂嘅「天價」服務，其實係咪王、李以至「服務提供」公司一齊夾好內容、價錢，繼而製造出虛假文書？第二個問題，就係佢哋咁做，係咪想借機騙取政府嘅開支津貼？如果屬實嘅話，一定要檢控涉事者（包括已經被捕嘅涉事公司前董事），否則選舉開支申報制度，就會變成一個參選人、候選人「我話幾多錢就幾多錢」嘅「數字遊戲」。
議員要有仿製槍
如果大家有留意新聞，會見到警方喺王百羽屋企搜出大量仿製武器，包括8支仿製長槍、17支仿製手槍、仿製彈藥同一把木弓，所以加控佢「管有仿製火器及彈藥」罪；至於李軒朗，警方就喺佢辦事處搜出「光復紅土」、「五大訴求」、「缺一不可」、「光復香港」同埋「時代革命」等字樣嘅手寫揮春。廣男喺度諗，點解攬炒派區議員要喺屋企收埋仿製槍、木弓，同埋又有攬炒派議員嘅辦事處會收埋有「港獨」標語嘅宣傳品？仿製槍加「港獨」宣傳品，大家諗到啲咩？
今次事件，可見所謂嘅「超區坦克車」，已經完全「炒車」，事件亦引證攬炒派如果欲以不法手段「呃錢」、反政府甚至反中央，注定會失敗且要承擔責任！
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論