我哋返工，如果連處理公司業務嘅基本能力都無，好可能會被解僱；政客從政，如果連基本政治倫理都唔顧，甚至係出賣國家，好可能會被唾棄。相同道理，如果有教師連基本能力都欠缺，亦無擔任教師應有嘅態度，教育界點解仲要留住呢啲人呢？繼九龍塘宣道小學嘅「宣獨」教師之後，教育局再出手DQ一名完全扭曲鴉片戰爭歷史嘅小學教師，教協葉建源認為「懲罰」不合比例，會協助教師上訴云云。囍雨只想問，如果教師無作為教師嘅能力同承擔，點做教師？教協係咪無嘢好講，所以攞「懲處不合比例」嚟做擋箭牌？

英國為了消滅鴉片發動戰爭？

囍雨作為一個80後，雖然中史、世史唔叻，但在學期間，呢段對中國以至香港有深遠影響嘅鴉片戰爭歷史，囍雨到依家都記得英國為咗自身利益，就發動咗鴉片戰爭；明明係一場不義之戰，但涉事教師竟然教學生「英國為了消滅鴉片發動了鴉片戰爭」，呢個彌天大錯，叫教育局、家長甚至學生點接受？其他離譜嘅錯誤，包括古人研發紙張是代替龜板、動物骨頭，以「防止動物絕種」，更加係聞所未聞。如果教育局輕輕放過呢位教師，咁教育界以後仲可以對教師有咩要求？

根據葉建源嘅說法，該教師入職後先得知要任教常識科，歷史知識「確有不足」；問題又嚟喇，一個教師，不論佢係教任何科目，關鍵在於，教師要備課；而備課係為咗咩呢？係為咗確保教學生嘅知識係正確！涉事教師欠缺知識，但連備課工作都做唔好，仲想解釋啲咩？如果連基本能力加同承擔都欠缺，咁好明顯係無資格當教師。

有心誤導 還是無心欺騙？

囍雨一直有懷疑，涉事教師可能唔係「知識不足」，而係有心誤導小二學生，當中嘅原因，當然離不開抹黑中國。如果係咁嘅話，情況就更為嚴重，一個又一個小二學生，咁細個就俾教師荼毒，長大以後，邊度有可能對國家有正確認識？家長又點放心將子女交俾呢啲教師？所以，不論係能力不足、欠缺承擔，定係故意為之，結論都只有一個，就係呢啲誤人子女嘅教師，應該要DQ！

今次再有教師被DQ，係完全唔關政治事，事件嘅重點，係教師嘅專業能力同承擔，囍雨仲想指出，今次事件如果唔係因為疫情期間要網上教學，都未必會揭發出嚟，到底仲有幾多教師喺不為人知嘅情況下「有意無意」地荼毒學生，真係一個謎！

圖片來源：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk