近日，有四名年輕人嘗試去美國駐港澳總領事館尋求政治庇護但失敗，其中一個人仲係美國公民，有支持佢哋嘅組織批評美領館拒絕施援，做法「可恥」。囍雨一向較現實，覺得美國啲政客經常擺出一副「與港人同行」嘅樣子，到啲反政府人士「有事」去尋求庇護就「睬你都傻」，得到嘅回應係「幫你唔到，留低電話，保持聯絡」呢幾句說話。其實呢個先係美國嘅真面目；所謂「支援香港」，政治口號嚟啫，真係唔好咁上心。

與港人、美國公民割席

對於美國駐港澳總領事館拒絕幫助幾個或者「有案在身」嘅年輕人，囍雨覺得一啲都唔出奇，因為美國所謂「支援港人」，其實用口講就多，實則行動就唔見多；但係，當美國總領事館連美國公民都唔幫，囍雨就覺得非常奇怪，當中原因，應該係美國總領事館係怕「惹禍上身」，隨時引發外交風波，被人封館，所以一定要置身事外。

呢件事所反映嘅，就係美國嘅虛偽，由總統特朗普、國務卿蓬佩奧到眾議院院長佩洛西，平日都擺出一副「好支持」香港抗爭者嘅樣子，但原來當抗爭者有事去佢哋領事館尋求庇護，佢哋係即時會「叫人走」嘅。點解會咁？因為美國由頭到尾，只係視香港、香港抗爭者為「反中國」嘅一張牌，有用果時就用你，你有事就無必要幫你！

所以，不論是尋求庇護失敗之後接受訪問嘅「王同學」，或者其他尋求庇護失敗嘅人，已經成為咗Condom中嘅Condom，攬炒派幫唔到佢哋啲乜，美國等外部勢力又唔出手幫；囍雨想大家諗返過去一年多，年輕人以為「違法達義」有出路，走上街頭抗爭甚至做埋暴徒，結果被捕、被檢控，斷送一生前程，而由黑暴運動中得益嘅，就只有不斷食人血饅頭嘅攬炒派議員及外部勢力。用自己嘅前途、「鮮血」去幫政客上位，呢班青年依家惶恐不可終日，搞到被檢控甚至有病都唔敢睇醫生，怕被洩露行踪，為咩呢？

政治爛頭卒的本質

唔少人成日話，班出嚟衝嘅年輕人，其實只係政客、外部勢力嘅政治爛頭卒；政治爛頭卒嘅本質係咩？就係有政客為咗政治目的煽動啲年輕人去抗爭，到你被捕、被檢控就「放棄」你，無咗利用價值，當然無必要再支援你。今次幾個年輕人尋求庇護失敗嘅事例再次話俾大家聽，黑暴政客以至外部勢力，謀求嘅係政治利益，絕對唔係年輕人嘅福祉！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk