以前大家成日話「天災無情，人間有愛」，但自從武漢肺炎出現之後，廣男對於呢個想法有啲「動搖」，有人批評港府有工作做得唔夠好，出於善意嘅批評廣男覺得無問題；但作為「和理非」代表、最大盲反派嘅民主黨，竟然發聲明要求「 即時停止往來內地與香港的所有高鐵﹑直通車﹑客運船隻及航機班次，及來往港珠澳大橋的金巴」。咁搞法，喺內地嘅香港人，佢哋點返香港呢？係咪要防疫，要搞到香港人都「有家歸不得」呢？
香港要鎖港？
對比一啲最極端嘅建議，民主黨唔算要求得「最盡」，不過佢哋嘅要求，近乎係切斷內地來港嘅大部分交通工具。防疫工作當然要做，來港嘅人填寫健康申報書要做，喺武漢逗留過嘅人或者要隔離等等，廣男都覺得呢啲要求「尚算」合理；但切斷內地來港嘅大部分交通，咁喺內地嘅香港人點算？
大家要明白，依家喺內地嘅人，唔止得內地人或外國人，好多香港人，無論係工作嘅、退休嘅、讀書嘅、探親嘅以至旅遊嘅等等，依家都有可能仲喺內地；民主黨呢個建議，等同叫佢哋「只可以留喺內地」，或者要返嚟都極度困難。咁樣做有兩個壞處，第一係如果建議「落實」，呢啲香港人好可能返唔到香港過年，第二就係如果佢哋有病而無交通工具回港，佢哋身為香港人就唔可以返香港求醫。民主黨呢種建議，即係連香港人都趕絕埋！
功利主義式建議
如果大家有睇過關於「功利主義」（Utilitarianism）嘅理論，可能都聽過「追求最大多數人的最大幸福」嘅論述，而為最大多數人追求幸福，可能就意味住少數人嘅福祉要被犧牲，呢個亦係「功利主義」最為人所垢病嘅地方之一。為多數人追求幸福，當然無問題，但民主黨呢種提倡，正正就如傳統嘅「功利主義」一樣，犧牲少數，犧牲部分香港人，廣男只能夠講句，好多喺內地嘅香港人，都係香港一分子，都唔應該被遺棄。
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論