出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
拉通緝犯都唔得?
拉通緝犯都唔得?

香港人經港珠澳大橋去澳門「被送中」?盲反派議員質疑截查唔合理?如果就咁睇前日《生果報》嘅頭版報道,囍雨有一刻真心以為香港人真係「被送中」,但冷靜啲諗下,內地人員做咩無端端要拉香港人呢?答案終於揭曉,原來所謂「被送中」嘅香港人,係一宗走私案嘅通緝犯!大家要問下《生果報》,內地捉通緝犯,叫「被送中」?如果執法人員拉通緝犯都叫「被送中」,咁以後內地執法人員咪唔駛做嘢?

 

《生果報》作風 「先嚇為主」

 

但凡涉及內地嘅新聞,尤其係可以借機抹黑內地嘅新聞,《生果報》經常都會「大做」,好似呢單所謂「港人被送中」嘅新聞,《生果報》日前直頭用頭版報道,一時話「有港人由香港乘搭穿梭巴士去澳門時疑『被送中』,至今失去聯絡逾30小時」,一時又引述盲反派議員稱「臨時截查措施不合理,雖然橋上是內地地方,但實際上當乘客由香港經大橋前往澳門,即使事主被澳門拒絕入境,亦只應是原車遣返香港」,但事實係點呢?

 

事實就係,原來涉案男子,喺2012年8月因為涉嫌組織粵港兩地貨車司機走私,而被深圳海關緝私分局通緝;內地公安廳指,據了解,涉案嘅鍾姓男子係該走私團夥嘅重要成員,珠海邊檢已經將佢移交俾辦案單位處理。至於喺港珠澳大橋拉人嘅問題,港珠澳大橋管理局表示,東人工島位於內地水域,公安有權設檢查站;換句話說,內地喺有司法管轄權嘅地方執法,合情合理!

 

用大話維持反政府行動

 

如果大家有留意埋今日《生果報》嘅報道,會發現佢同前日用頭版報道事件有好大對比,當《生果報》今日再報道事件,稱「珠海挾走港漢︰走私通緝犯」,只係用A8去報道;即係抹黑內地嘅時候就大大聲,到要澄清返就擺喺較後版面,內容仲要繼續抽水,稱內地喺人工島設關卡,係「堂堂大國竟設下陷阱」。呢種抹黑完人仲要話人唔啱嘅報道手法,真係得《生果報》先「做得出」。

 

好明顯,呢件事就係有人涉嫌違法被通緝,內地人員繼而執法,成件事好簡單。點解《生果報》要炒作到件事「咁大」?好簡單啫,危言聳聽、煽動仇中、散播仇恨,一向係《生果報》嘅任務,如果有機會而唔製造恐慌,咁就唔係《生果報》啦!不過,《生果報》今次好明顯係炒咗車,就如反政府人士之前講嘅8.31太子站死人、男子被警察雞姦以至拍片稱「有人無故被拉上大陸」一樣,全部都係假嘅!當一場社會運動要依靠大話去維持,大家話幾可悲呢? 


原圖:rthk


請Follow我們的YouTube頻道:

https://bit.ly/2kgU8qg


下載我們的手機應用程式,收看第一手精彩內容:

https://www.speakout.hk/app

3
唔係呀哇
2
嬲爆
3
超無奈

評論