前幾日囍雨同大家講過，依家香港最得人驚嘅就係被一股黑色恐怖所籠罩，已經好多港鐵站、公共設施、商家店鋪被一再破壞，好多市民出街都人心惶惶，唔知何時何地可能被暴徒「私了」，但係猶是如此，都仲有人對時下嘅暴力表示「理解」甚至「諒解」，囍雨真係好想問下持呢種意見嘅人士，當你哋睇過去呢個週末嘅暴力之後，係咪繼續選擇「諒解」呢？簡單嚟講，暴徒除咗繼續瘋狂襲擊警察之外，另一個明顯特徵就係已經發展到罔顧所有普通市民嘅生命安全。囍雨認為，如果大家再唔齊心遏制呢啲恐襲級暴力，任由佢繼續遍地開花，大吉利是講句，點知下一個遭殃嘅唔係你同我？

爆炸品有疑似電子裝置

囍雨綜觀呢兩日嘅傳媒報道之後，打算先同大家講幾個案例。例如喺星期六，港鐵九龍塘同荔枝角站都有黑衣暴徒向站內掟汽油彈，其中喺九龍塘車站，大堂迅即起火冒出濃煙，請大家留意，最緊要嘅係當其時兩個車站都仲有市民出入；去到星期日，大批暴徒響應「遍地開花」行動，喺全港多區快閃破壞，包括繼續襲擊鐵路系統，其中就有人將大批雜物掟向營運中嘅東鐵同輕鐵路軌。此外，當晚喺旺角彌敦道一帶，更一度發生爆炸事件，有在場人士稱「巨響幾乎震穿耳膜」，需要出動警方爆炸品處理課到場，喺現場就發現疑似電芯、電路板、手機、電話卡等「製爆」工具。

除咗呢啲惡性事件之外，暴徒破壞中資商舖、私了政見唔同嘅市民就更加好似「家常便飯」。囍雨見到一個正義女士就因為喺旺角隻身搬開暴徒路障，就被噴油、中飛腳、扯髮拖行；將軍澳一對中年夫婦因為同暴徒口角，結果丈夫被棍插額頭，血流披面。其實同類事件連日喺全港多區都不斷發生，多不勝數。

講完呢啲案例，囍雨最想大家睇清一點，就係當暴徒開始動用爆炸品，甚至疑似意圖釀成大量傷亡嘅時候，其性質已經無異於恐怖襲擊。大家諗下，例如暴徒向地鐵站掟汽油彈，地鐵站本身就係相對密閉嘅空間，而且當時人來人往，隨時會造成多人受傷甚至人踩人慘劇；又例如將雜物掟入鐵路路軌，即使一個小物件，都可能導致車毀人亡。而喺鬧市出動爆炸品就更加恐怖，警方證實有人用手機遙控引爆，而且威力唔細，今次無人傷亡可能只係因為「好彩」。大家仲覺得呢啲係「示威者」咩？囍雨就話佢哋根本係恐怖分子。

盲反派 又消失？

囍雨依家最擔憂嘅，係呢班暴徒已經唔單止「罔顧」市民安危，而係根本似想製造傷亡。但係講到止暴制亂、保護廣大市民安全，依家除咗警隊堅守前線之外，大家應該問，果班堅持與暴力「同行」嘅盲反派每逢呢啲時候又消失咗去邊呢？囍雨就依然唔見有人企出嚟譴責喇！囍雨喺度再次奉勸呢班盲反派政客，請馬上與暴徒暴力割席，唔好再縱容佢哋「攞市民條命嚟較飛」；另一方面，所有真正珍惜香港嘅市民都要凝聚民意、齊聲反暴力，唔好再讓警隊孤軍作戰。今時今日，忍，暴徒唔會收手，只會更猖狂，影響更多人，而且隨時「他朝君體也相同」！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app