美化暴行 轉移視線
美化暴行 轉移視線

前日喺立法會發生嘅,明明係一幕又一幕令人動魄驚心嘅暴力衝擊、惡意破壞場面,但最鍾意美化暴力、違法行為嘅《生果報》,卻可以將暴徒故事講到十分之淒美;今日囍雨睇《生果報》,見到有一篇題為〈採訪手記:他們粗聲粗氣 但很善良〉嘅報道,內容講述記者當晚嘅「所見所聞」,講述一班惡漢衝入會議廳「抬走」喺立法會嘅留守者,記者以「這群人很惡,真的很惡,但記者看得一清二楚,他們內心都很善良」去形容佢哋。呢種感覺似「暴徒很惡,但很善良」嘅論調,將暴力行為「浪漫化」,香港人真係多得《生果報》唔少!

 

渲染「可歌可泣」的故事

 

喺《生果報》呢篇採訪手記,文章頭段主要係講一班暴徒對於係咪要撤離有唔同意見,最後大家得出共識,就係尊重幾個「死守者」嘅選擇,其他要離開嘅就喺立法會外堅守、擋住警察,最後留守嘅示威者則有五個人;突然一班粗聲粗氣嘅惡漢衝入會議廳,記者稱呢班惡漢只係留守外面嘅示威者,因為唔忍心見同伴「送死」,所以專誠用「武力」抬走留守者,記者以「這群人很惡,真的很惡,但記者看得一清二楚,他們內心都很善良」嚟形容呢班人。

 

睇到呢個故事,大家可能會有種諗法,就係無論係衝咗入立法會嘅暴徒,抑或係入去抬走佢哋嘅「同伴」,都係有情有義、有血有肉嘅人,佢哋嘅故事就算稱唔上悲壯,起碼都稱得上為「人間有情」;但囍雨想指出,佢哋嘅故事唔係大家睇過嘅災難片,講述英雄點樣喺災難現場救人,而只係一班衝擊、破壞公家地方嘅人唔想走,最後由其他「同伴」抬走。《生果報》呢篇報道,或者可以感動到部分支持者,但對唔住,無論將故事講到幾感人,都改變唔到一班人用暴力手段犯法、破壞咗立法會嘅事實!

 

不滿制度 = 可以肆意破壞?

 

老實講,根據盲反派政客以至《生果報》嘅邏輯,如果唔滿意制度、法案就可以肆意破壞,咁情況再推演落去,會唔會變成暴徒殺人都無罪(事實上,暴徒向警察撒有毒粉末、通渠水極危險)?綜觀近日嘅風向,盲反派、《生果報》以至個別媒體係咁將責任推落政府、建制派度,又不斷用「唔同方式」美化暴徒,將暴力事件同所謂「制度暴力」扯上關係,稱年輕人「無辦法」先衝擊等等;囍雨必須指出,呢啲全部都係歪理,目的只是轉移視線,合理化暴行,須知道有不滿唔等於可以犯罪,有訴求亦唔等於可以犯法、損害法治。喺呢度,囍雨呼籲所有聲稱自己愛香港嘅人,如果你哋真係念及下一代嘅前程、安危,就唔好再美化暴力行為,顛倒是非黑白,不要讓年輕人一錯再錯好嗎? 


原圖:大公報


26
支持
11
好正
3
無意見

評論