呃人嘅最高境界，從來都係呃到人之餘，連自己都呃埋，好似盲反派班政客咁，佢哋近年犯法畀人拉、畀人告果時，極度鍾意話自己係「政治犯」，講到其他人以為佢哋真係被逼害咁款；因為刑事藐視法庭被判入獄嘅「香港眾志」秘書長黃之鋒，近日就寫咗篇文講自己嘅「獄中生活」，言談間不斷強調「政治犯」三個字，但廣男就覺得好古怪，黃之鋒犯法，自己喺法庭度認罪兼道歉，咁佢邊可能係「政治犯」呀？佢係咪喺度「自我催眠」緊？

當正自己係「政治犯」？

今日《生果報》登咗黃之鋒一篇題為〈獄中書簡：傾談中的理解 雀躍中的糾結〉嘅文章，黃之鋒除咗講自己喺監獄嘅「點滴」之外，廣男覺得佢篇文最「吸睛」嘅地方，就在於佢喺行文之間，不斷強調「政治犯」三個字，一時話自己會寫信關心其他在囚「政治犯」，一時又話比起「佔中」四子同暴動案嘅「政治犯」，自己實在係「九牛一毛」，一句到尾，就係想講自己以至其他盲反派囚犯係「政治犯」囉！

廣男又係果句，如果有人無犯法而因為政見而被逼害、被告甚至被判監，咁果個人話自己係「政治犯」，廣男唔會反對，但黃之鋒等人絕對唔係咩「政治犯」！以黃之鋒為例，佢因為犯咗刑事藐視法庭被判監，佢自己喺庭上面認罪之餘仲有向法庭道歉，如果黃之鋒呢個「政治犯」自己認罪，仲要向法庭道埋歉，似乎就太有趣喇！至於其他盲反派囚犯包括「佔中」案同旺暴案嘅罪犯，佢哋明顯犯咗刑事罪行，根本同「政治犯」沾唔上邊。

犯完法仲話受迫害

老實講，黃之鋒之所以不斷重複「政治犯」呢幾個字，無非都係想誤導公眾，令到人覺得佢以至其他盲反派囚犯都係被逼害嘅，但大家不如又用另一角度諗下，如果盲反派政客可以因為打住「政治旗幟」違法而無事，咁以後社會仲需要法律咩？廣男就覺得，政客違法、破壞社會故然可恨，佢哋犯完法仲想話人逼害佢哋，更加可恨！

原圖:RTHK