出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
黃台仰係難民?
黃台仰係難民?

有傳媒報道,正在潛逃嘅旺角暴動案疑犯黃台仰獲得德國政府批出難民庇護,囍雨睇到呢單新聞可以話係「大惑不解」,「難民」呢個字畀人嘅感覺,係一啲受到迫害甚至有殺身之禍嘅人,迫於無奈而流亡海外成為難民,但黃台仰作為一單暴動案嘅疑犯、逃犯,甚至畀人話係「主犯」,佢憑乜嘢可以得到外國庇護呢?如果犯咗事離開香港就可以得到庇護,咁仲成世界嘅?

 

黃台仰、李東昇棄保潛逃

 

根據《紐約時報》報道,暴動案疑犯(亦可以話係棄保潛逃嘅逃犯)黃台仰同李東昇喺去年五月,獲得德國批出難民庇護,報道仲形容今次事件係回歸以嚟第一次有香港人獲得外國庇護,有關報道甚至得到黃台仰用短訊回覆,黃台仰表示擔心最終會被認出,認為唔能夠再隱藏落去,日後會交代更多詳情;而德國有關部門亦向《紐約時報》證實,去年向兩名香港人批出難民庇護,但就無透露二人身份。

 

黃台仰曾揚言寧為玉碎

 

雖然德國有關部門未有公開獲庇護嘅港人身份,但黃台仰本人已經承認有呢件事,囍雨真係要問一句,佢哋點解係「難民」呢?如果一個人無犯法或者涉嫌違法,被政府或者執法部門所迫害而要流亡海外,咁呢啲就稱得上為難民;但黃台仰同李東昇作為本港旺角暴動案嘅疑犯,所犯嘅係刑事罪行,其中黃台仰更加可以被稱為「主犯」,佢哋有資格成為難民,得到其他國家庇護咩?唔好忘記,黃台仰喺旺角暴動發生後,曾揚言將有更多議題走上街頭抗爭,「希望大家能夠相信及堅持:寧為玉碎、不作瓦全」,難度有人涉嫌違法後講明自己「寧為玉碎、不作瓦全」,仲可以成為「難民」?

 

另一個問題,就係黃台仰同李東昇,其實舊年已經獲批庇護,點解傳媒尤其係美國媒體,要喺呢個時候將呢個消息公布出嚟呢?係咪因為本港立法會正在審議《逃犯條例》修訂,外國媒體要喺呢個時候放出消息,話畀人聽如果《逃犯條例》修訂通過咗,呢啲盲反派稱為「政治犯」嘅人,就會受到影響呢?事實上,黃台仰本人接受《金融時報》訪問,亦表明關注《逃犯條例》,稱自己作為一名「政治犯」有必要發聲,擔心修例後會「永遠無法回港」,又話而家先公布消息,係因為要引起外界關注六四30周年。換句話說,外媒而家先報道有關事件,黃台仰本人又表示關注修例,其實係「時間」夾得啱啱好,好似跟個劇本嚟做咁,就係要借事件反對《逃犯條例》修訂,製造聲勢。

 

旺角暴動「叫人衝」

 

講開旺角暴動,又講開黃台仰,囍雨喺度要提提大家,喺旺角暴動案梁天琦在法作供嘅時候,清楚地講過黃台仰喺暴動期間叫人「數三聲,就衝!」,仲同梁天琦講「你唔衝過去,他們(警察)都衝埋嚟」,之後黃台仰就號令暴徒衝向警方;囍雨必須強調,呢番說話係出自黃台仰「戰友」梁天琦把口,如果黃台仰呢個暴動案疑犯、「主犯」可以得到難民庇護,囍雨只能講句,世上任何罪犯,都有潛質成為難民,得到「免責」保護傘!


原圖: 大公報

6
支持
9
好正
4
無意見

評論

  • Andy Ho
    Andy Ho
    1月前
    0 回應
    蝗抬養根本就不是經灣難民。我非常質疑德國說蝗抬養是經濟難民合法性。

    沒有更多評論

    沒有更多評論