遊行變助選活動?
遊行變助選活動?

立法會九龍西補選今日開始接受參選者提名,而噚日盲反派就舉辦一場所謂「拒絕危城」嘅遊行,表面上就係為質疑沙中線工程甚至《基本法》23條立法;但有傳媒就踢爆,話個遊行好似為已經報名參加九龍西補選嘅工黨劉小麗搭台咁,事關遊行由劉小麗帶頭,遊行到咗政總集會果時社民連梁國雄又叫人支持劉小麗。廣男就質疑,如果呢個遊行變成助選活動,計正嚟講呢個係咪劉小麗嘅競選活動,要計選舉開支嘅呢?


梁國雄在集會叫人支持劉小麗


根據傳媒報道,喺遊行隊伍到達政府總部果時,社民連梁國雄同劉小麗一齊上台發言,梁國雄喺台上表明支持劉小麗參與補選,更呼籲遊行者「行多一步」,喺立法會補選為劉小麗投票,仲問在場者「大家11月識唔識做?總之有人就出人,冇人就出錢!」,雖然梁國雄事後聲稱唔係為劉小麗「拉票」,但廣男就覺得單嘢有可疑。


雖然廣男唔係咩法律專家或者政界人物,但平時睇開時事、社會新聞,大概都知道如果一個活動係幫人拉票、助選,咁呢個活動計正都係屬於選舉活動,好可能要申報埋選舉開支。而家梁國雄喺一個公開活動度「疑似」叫人喺選舉支持劉小麗,變相幫劉小麗拉票、助選,廣男就非常質疑呢個遊行嘅開支係咪要計埋落劉小麗嘅選舉開支度呢?而呢個遊行出現過嘅宣傳品,又屬唔屬於劉小麗嘅選舉宣傳品而要申報呢?呢個問題確實值得思考!


搭大台 為助選


發生疑似遊行變助選一事,廣男就覺得發起遊行嘅民陣都絕對有需要出嚟交代清楚,而家有政客當個遊行集會係吹雞拉票嘅活動,主辦者民陣知唔知架先?定只係有人自把自為「騎劫」咗個活動?如果民陣知情並且默許梁國雄上台為劉小麗拉票,咁廣男覺得呢個係選舉活動幾乎都冇乜懸念架喇。廣男亦要喺度問下劉小麗,而家有人幫你喺遊行集會上拉票,你自己有冇份策劃嘅呢?如果所謂「拒絕危城」遊行原來係一場助選活動,廣男真心覺得劉小麗咁樣踩鋼線「危」好多囉!


已宣布會參選九龍西補選嘅仲有食物及衛生局前政治助理陳凱欣,以及前立法會議員馮檢基。


原圖:wenweipo

0
驚訝
4
唔係呀哇
0
無意見

評論