出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
【為小米喝采】撐消委會即係撐香港品牌呀,本土派!
【為小米喝采】撐消委會即係撐香港品牌呀,本土派!

唔少香港市民都鍾意用空氣清新機,尤其屋企有小朋友,為咗寶貝嘅健康著想,家長貴一貴嘅空氣清新機都會買。消委會尋日公布一項檢測結果,發現某內地知名品牌嘅空氣清新機,表現可以用「平、靚、正」去形容,檢測成績仲好過定價貴四倍嘅歐洲機!中國品牌有呢類表現,絕對係香港市民福音,因為唔使捱貴嘢吖嘛,可惜再班玻璃心本土派網民,死都唔認同消委會個結果,仲話一定係造假、作大、歐洲嘢一定好等等。到底呢班人明唔明,撐消委會其實即係撐香港架?

香港消委會甚有公信力

消委會成立至今已經超過40年,佢嘅公信力係來自幾十年嘅工作表現,同埋大量不偏不倚嘅檢測報告。囍雨好幸運,當年讀書時上過消委會前總幹事陳黃穗嘅課,陳太同學生分享時提到,消委會工作嘅首要目標係「公平、公開、公正」,因此所做嘅各項檢測同研究,一定係搵合資格、高水平、合國際標準嘅專家同場所去做,而且所有數據同埋檢測方法都詳列出嚟,再加上消委會用嘅係公帑,唔需要考慮商業利益或者利益衝突,自自然然就會做出「公信力」。

經過幾十年努力,消委會已經成為香港呢個地嘅國際知名品牌之一,而且唔係一面之詞喎,就連聯合國大會喺2015年12月通過嘅《聯合國消費者保護準則》,事前都有邀請香港消委會參修訂工作同提交意見。大家撫心自問,如果消委會冇公信力,聯合國又點會聽佢意見?唔好玩啦,好唔好!

攻擊香港消委會 等同攻擊香港品牌

事實上,班本土派玻璃心明顯係睇都唔睇消委會講乜就出聲鬧消委會,有啲仲留言話想知道消委會檢測係點做,夠唔夠專業公平等。大佬呀,呢啲資料一早已經公布咗,鬧人、質疑人之前唔該唔好咁懶,上網搵多少少資料,就連被指表現遜色嘅歐洲品牌都唔夠膽話消委會「造假」,你班人一味盲反內地品牌、一味感官式批評消委會,真係可笑又悲哀。

囍雨喺度鄭重咁同呢班本土派玻璃心講,撐香港消委會,即係撐香港品牌!香港消委會係一個喺國際上有極高公信力嘅「生招牌」,你班玻璃心無憑無據咁去攻擊消委會,一見到內地品牌質素高就鬧鬧鬧,其實只係因為你班人已經被蒙蔽雙眼,唔肯接受唔少內地製造產品質素其實非常之高嘅事實。無理攻擊香港消委會,即係想打爛香港其中一個金漆招牌,咁都叫為香港好?咁都叫本土派?本乜嘢土呀?

原圖:消費者委員會

12
搞笑咩
2
好喎
7
好好笑
0
嬲爆
7
超無奈

評論